Sloveniyada O‘zbekiston prezidentini rasmiy kutib olish marosimi bo‘ldi (foto)

Lyublyanadagi Kongress maydonida Sloveniyaga rasmiy tashrif bilan kelgan Shavkat Mirziyoyevni rasmiy kutib olish marosimi bo‘lib o‘tdi.

Prezident matbuot xizmatining xabar qilishicha, davlat rahbarini Sloveniya prezidenti Natasha Pirs Musar kutib oldi. Oliy martabali mehmon sharafiga faxriy qorovul saflandi. Harbiy orkestr O‘zbekiston va Sloveniya davlat madhiyalarini ijro etdi.

Ikki mamlakat rahbarlari faxriy qorovul safi oldidan o‘tib, rasmiy delegatsiyalar a’zolari bilan salomlashdi.

Rasmiy marosimdan so‘ng “Zvezda” bog‘ida urush qurbonlari xotirasiga hurmat hamda tinchlik va insonparvarlik g‘oyalariga sadoqat ramzi sifatida Barcha urushlar qurbonlari yodgorligiga gul qo‘yildi.

Lyublyanadagi Kongress maydonida rasmiy kutib olish marosimidan lavhalar

Shavkat Mirziyoyevning Sloveniyaga tashrifi

Shavkat Mirziyoyev Sloveniya prezidenti Natasha Pirs Musarning taklifiga binoan rasmiy tashrif bilan 21-may kuni rafiqasi bilan Lyublyanaga keldi. Ularni samolyot oldida bosh vazir o‘rinbosari — tashqi ishlar vaziri Tanya Fayon va boshqa rasmiy shaxslar kutib oldi.

Tashrif dasturiga muvofiq, O‘zbekiston yetakchisi Sloveniya prezidenti Natasha Pirs Musar bilan muzokaralar o‘tkazadi, mamlakat parlamenti va hukumati rahbariyati bilan uchrashuvlar o‘tkazadi, qo‘shma biznes forumida ishtirok etadi.

O‘zaro manfaatli savdo-iqtisodiy sheriklikni rivojlantirish, sanoat, farmatsevtika, elektrotexnika, “yashil” energetika, qishloq xo‘jaligi sohalarida kooperatsiya loyihalarini amalga oshirish, mehnat migratsiyasi bo‘yicha hamkorlik va gumanitar aloqalarni kengaytirish masalalari ko‘rib chiqiladi.

O‘zbekiston—Sloveniya munosabatlari 

Sloveniya O‘zbekiston mustaqilligini 1991-yil 27-dekabrda tan olgan bo‘lib, ikki davlat o‘rtasida diplomatik munosabatlar 1995-yil 16-yanvarda o‘rnatilgan. 2024-yil oktyabr oyida Oybek Shaxavdinov O‘zbekistonning Sloveniyadagi birinchi elchisi etib tayinlandi.

So‘nggi yillarda O‘zbekiston va Sloveniya o‘rtasidagi savdo-iqtisodiy aloqalar rivojlanmoqda. 2024-yilda ikki tomonlama savdo hajmi 175 million dollardan oshdi, bu 2023-yilga nisbatan 25 foizga o‘sishni anglatadi . 2025-yilning birinchi choragida esa savdo hajmi 127 million dollarni tashkil etib, o‘tgan yilning shu davriga nisbatan 47,8 foizga o‘sdi.

Sloveniya Yevropa Ittifoqi a’zosi sifatida O‘zbekiston uchun Yevropa bilan aloqalarni mustahkamlashda muhim sherik hisoblanadi.