O‘zbekiston Markaziy banki pul-kredit siyosati bo‘yicha sharhida ichki avtomobil bozori dinamikasini tahlil qildi. Unda avtomobillar narxi yangi va eski hamda kam va ko‘p foydalanilgan turlarga ajratgan holda o‘rganildi.
Tahlillarga ko‘ra, 2023-yilning mart oyidan boshlab yangi avtomobillarning so‘m va dollardagi narx indekslarida sezilarli pasayish kuzatildi. Kelgusi davrda so‘mdagi narxlarda o‘sish qayd etilgan bo‘lishiga qaramay, dollardagi qiymatida umumiy pasayuvchi trend saqlanib qoldi.
2025-yildan boshlab narxlarning o‘suvchi dinamikaga o‘tgani kuzatilmoqda. Xususan, mart oyi yakuniga ko‘ra, yangi avtomobillar ikkilamchi bozor narxlarining oshishi 2024-yilning mos davriga nisbatan so‘mda 4,7 foizni (dollarda — 1,6 foiz) tashkil etgan.
“Ushbu holat ichki bozorda yangi mashinalarga talab yuqoriligi sharoitida import hajmining sezilarli kamayishi bilan izohlanishi mumkin”, deyiladi hisobotda.
Shu bilan birga, eski avtomobillar narxlari indeksida farqli tendensiyalar kuzatildi. Xususan, dollardagi narxlar 2023-yilning sentyabrigacha, so‘mdagilar esa 2024-yilning o‘rtalarigacha bazaviy davrga nisbatan baland shakllandi. Kelgusi davrlarda ikkala indeksda ham narxlarning pasayish tendensiyasi davom etmoqda.
“Ko‘p foydalanilgan avtomobillar narxining pasayishi bozorda yangi mashinalarga bo‘lgan talabning o‘sayotgani, ya’ni aholi xarid qilishda, asosan, sifat, kafolat, yonilg‘i samaradorligi va yangi texnologiyalarni afzal ko‘rishi kabi omillar bilan bog‘liq bo‘lishi mumkin”, deyiladi sharxda.
Shuningdek, kredit va lizing imkoniyatlari asosan, yangi avtomobillar uchun qo‘llanayotganini, bundan tashqari, avtomobilning investitsion jozibadorligi pasayishi narxlar pasayishi bo‘yicha kutilmalarning shakllanishiga xizmat qilayotgani qayd etib o‘tildi.
Bojxona qo‘mitasi ma’lumotlarida keltirilishicha, 2025-yilning birinchi choragida O‘zbekistonga avtomobil importi keskin kamaydi. Yanvar—mart oylarida mamlakatga 6 794 ta yengil avtomobil olib kirildi, bu 2024-yilning shu davriga nisbatan 3,2 barobarga kamdir. Import qiymati esa 4,2 barobarga kamayib, 115 million dollarni tashkil etdi.
Iqtisodiy tadqiqotlar va islohotlar markazi tahlillariga ko‘ra, 2025-yil aprel oyida yengil avtomobillar savdosi 20 foizga o‘sdi. Yengil avtomobillarning birlamchi bozorida sotuvlar o‘tgan oyga nisbatan 15 foizga oshib, 26 mingta avtomobilni tashkil etdi. Mamlakatda ishlab chiqarilgan yangi yengil avtomobillar sotuvi 20,5 mingtani tashkil etib, o‘tgan oyga nisbatan 4 foizga o‘sdi.
2025-yilning mart oyida sotuvlar hajmi 2 foizga qisqargan foydalanilgan yengil avtomobillar bozoridagi faollikning biroz sekinlashuvidan so‘ng, bozor aprel oyida kuchli tiklanishni ko‘rsatdi. Savdolar 22 foizga oshib, sotilgan avtomobillar soni 52 ming donaga yetdi.
Izoh (0)