“Poytaxt bank” AJ ustav kapitalidagi 100 foiz aksiyalar paketini BAAning Bond Investments limited LLC kompaniyasiga 10 million dollarga sotish bo‘yicha kelishuvga erishildi. Bu haqda Davlat aktivlarini boshqarish agentligi ma’lum qildi.
Avvalroq mazkur bank davlat ulushini ommaviy savdo jarayoni natijasida “Ekspobank” AJ (Rossiya) bilan tegishli kelishuv imzolangan edi. Biroq xalqaro munosabatlarda yuzaga kelgan vaziyat sababli “Ekspobank” tomonidan amaldagi kelishuv shartlarini bajarish imkoniyati mavjud emasligi inobatga olinib, u o‘zaro kelishuvga asosan bekor qilingan.
Bitimni huquqiy jihatdan to‘liq yakunlash uchun investor tomonidan O‘zbekiston Markaziy bankining “Poytaxt bank” AJ aksiyalarini sotib olishga doir dastlabki ruxsatnomasini olish talab etiladi.
Eslatib o‘tamiz, 2017-yil O‘zbekiston Markaziy banki Toshkentda “Poytaxt bank” tashkil etilishini maʼlum qilgan edi. Mazkur bank arzon ko‘p kvartirali uylarni loyihalashtirish va qurishga buyurtma berish hamda ipoteka kreditlarini ajratish bilan shug‘ullanish uchun ochilgan. 2018-yil 29-dekabr kuni Markaziy bank unga bank operatsiyalarini amalga oshirish uchun litsenziya bergan.
Izoh (0)