Zamonaviy hayot tarzini tanlagan va nozik did bilan kiyinadigan sharq malikalari

Yevropa monarxlari ko‘pincha protokolga qat’iy rioya qilishlari uchun tanqidga uchraydi, bu ko‘pincha haddan tashqari vazminlik va bir xillik sifatida qabul qilinadi. Biroq Osiyo malikalari va qirolichalari uslubi stereotiplardan tashqariga chiqib, xilma-xillikni namoyish etmoqda. . Bundan tashqari, ularning ko‘pchiligi moda do‘konlarini ochish orqali o‘z brendlarini yaratmoqda.

Imon Afzon — Pahang malikasi

Imon Afzon Malayziyani 2014-yildan 2019-yilgacha boshqargan Pahang sultoni Abdulloh II ning to‘ng‘ich qizi hisoblanadi. Ko‘plab qirollik oilalari a’zolaridan farqli o‘laroq, Imon Afzon jamoat hayotida faol ishtirok etadi. U Angliyaning Nottingem universitetida siyosatshunoslik bo‘yicha ta’lim olgan va Malayziyaga qaytgach, ijtimoiy faoliyat bilan shug‘ullana boshlagan. U Qirollik ruhiy salomatlik jamg‘armasining homiysi sifatida kam ta’minlangan oilalarga yordam ko‘rsatadi va mehribonlik uylaridagi o‘smirlarning ta’lim olishiga ko‘maklashadi. Shuningdek, u fuqarolarning ruhiy farovonligini yaxshilashga qaratilgan islohotlarni qo‘llab-quvvatlaydi.

Amaldagi qonunchilik Imon Afzonning Malayziya qirolichasi bo‘lishiga imkon bermasa-da, u allaqachon xalq hayotidagi faol ishtiroki tufayli sevimli shaxsga aylangan. Shu bilan birga, uning siyosiy faolligi uning doimo zamonaviy va nafis ko‘rinishiga xalaqit bermaydi, bu haqda ijtimoiy tarmoqlardagi muxlislari muntazam ravishda ta’kidlab o‘tishadi.

Kako — Yaponiya malikasi

Yaponiya imperatorlik oilasiga mansub Kako taxt vorisligi tizimida ikkinchi o‘rinda turgan, biroq imperator bo‘lmagan shahzoda Fumihitoning qizi hisoblanadi. Bevosita taxt vorisi bo‘lmasa-da, Kako jamiyat hayotida faol ishtirok etadi. U tabiiy ofatlardan jabrlanganlarga ko‘maklashadi, xayriya ishlari bilan shug‘ullanadi va she’rlar bitadi. 2014-yilda voyaga yetgach, yapon xalqiga sadoqat qasamini ichgan ilk malika unvoniga sazovor bo‘ldi.

Amaldagi imperatorning ham qizi, malika Aiko mavjud bo‘lsa-da, jamoatchilik e’tibori aynan Kakoga qaratilgan. Unda buvisi, imperatorlik oilasiga mansub bo‘lmagan birinchi ayol sifatida valiahd shahzoda Akihitoga turmushga chiqqan malika Mitikoga o‘xshashlik ko‘rishadi. Malika Kako mehribonligi, nozik didi va fuqarolarga g‘amxo‘rligi tufayli e’zozlanadi.

Ezurin Xayra — Malayziya malikasi 

Malayziya fuqarolari Ezurinning qirol Tunku Dato Yakob Xayraga turmushga chiqib, amalda mamlakatni boshqargan davrlarini deyarli unutib yuborgan. Bugungi kunda u hashamatli turmush tarzi bilan tanilgan: Ezurin vaqtining ko‘p qismini Yevropa va AQShda o‘tkazib, moda namoyishlarida qatnashadi hamda ijtimoiy tarmoqlarida qimmatbaho kiyimlarni ko‘z-ko‘z qiladi.

Eri bilan ajrashgandan so‘ng, Ezurin “Uy” nomli realiti-shou loyihasini e’lon qildi. Unda u va besh farzandi odatiy hashamatli hayotdan voz kechib, chekka qishloqda yashashga moslashishga harakat qilishdi. Bu loyiha katta qiziqish uyg‘otdi, ayniqsa, sobiq model sifatida tanilgan Ezurin qirollik oilasi doirasida ham haddan tashqari dabdabaga berilgani uchun ko‘p tanqidga uchragandi.

Sirivannavari Nariratana — Tailand malikasi 

Tailand qiroli Rama X va aktrisa Yuvadxida Suratsavadining qizi Sirivannavari monarxlar an’analarini buzmoqda. Tailand taxtining merosxo‘rlik qatorida uchinchi o‘rinda tursa-da, u tadbirkorlikni tanlagan. Parijda moda bo‘yicha magistraturani tugatgach, Sharq va G‘arb uslublarini uyg‘unlashtirib, noyob kiyimlar taklif etuvchi o‘z brendini yaratdi.

Biroq uning shuhrati moda doirasidan tashqariga chiqib ketdi. Sirivannavari ko‘pincha eng zamonaviy insonlar ro‘yxatiga kiritiladi, Parij va Milandagi yirik moda tadbirlariga qatnashadi hamda qirollik a’zolari haqidagi tasavvurlardan yiroq bo‘lgan dunyoviy hayot tarzini kechiradi. Shunday bo‘lsa-da, u vaqti-vaqti bilan turli mojarolarga sabab bo‘ladi va jamiyatning ayrim vakillari orasida norozilik uyg‘otadi.