Ўзбекистонда айрим тадбиркорларга гаровсиз кредитлар берилади, деб хабар бермоқда Адлия вазирлиги.
Маълум қилинишича, “Кичик ва ўрта бизнеснинг иқтисодиётдаги ўрнини ошириш чора-тадбирлари тўғрисида”ги президент фармони қабул қилинди. Фармонга кўра, 2025 йилда кичик ва ўрта бизнесни ривожлантиришнинг асосий мақсадли кўрсаткичлари этиб қуйидагилар белгиланди, жумладан:
- кичик ва ўрта бизнеснинг ялпи ички маҳсулотдаги улушини 55 фоизга, саноатда — 34 фоизга, экспортда — 34 фоизга ва аҳоли бандлигини таъминлашда — 75 фоизга етказиш;
- камида 600 нафар кичик ва ўрта бизнес субъектларининг йириклашишига кўмаклашиш орқали уларни “чемпион” тадбиркорларга айлантириш;
- 100 нафардан кўп ишчиси бор тадбиркорлик субъектлари сонини 4 мингга етказиш.
Шунингдек, 2025 йил 1 майдан:
- ўзини ўзи банд қилган шахслар ЯТТ ёки юридик шахс сифатида давлат рўйхатидан ўтказилганда, давлат божи ундирилмайди;
- ўз фаолиятини тегишинча ЯТТ, микрофирма ёки кичик корхона тоифасигача йириклаштирган ўзини ўзи банд қилган шахслар ва тадбиркорларга оилавий тадбиркорликни ривожлантириш дастури доирасида 50 миллион сўмгача, кичик бизнесни узлуксиз қўллаб-қувватлаш комплекс дастури доирасида — 150 миллион сўмгача гаровсиз кредитлар берилади;
- ўз фаолиятини тегишинча ўрта ёки йирик бизнес тоифасигача йириклаштирган тадбиркорларга — 1 йил давомида ҚҚС суммаси ўрнини қоплаш (қайтариш) 7 кун муддатда тезлаштирилган тартибда амалга оширилади.
Ўзбекистонда ижобий кредит тарихига эга бўлган хотин-қизларга 100 миллион сўмгача гаровсиз кредит ажратилади. Бу ҳақда “Оила ва хотин-қизларни қўллаб-қувватлаш тизимини янада такомиллаштириш чора-тадбирлари тўғрисида”ги президент қарорида белгиланди.
Шунингдек, Ўзбекистонда 2025 йилда кичик ва ўрта бизнесга 120 триллион сўм ресурс берилади. Бу ҳақда Шавкат Мирзиёев кичик ва ўрта бизнес вакиллари билан соҳанинг иқтисодиётдаги ўрнини ошириш ва ривожланишини янги босқичга олиб чиқиш масалаларига бағишланган учрашувда айтди.
Изоҳ (0)