Латвияга ишлаш мақсадида бориб, оғир касалликка чалинган ўзбекистонлик фуқаро Ўзбекистон элчихонаси ходимлари кўмагида оиласи бағрига қайтарилди. Бу ҳақда “Дунё” хабар берди.
Хабарда келтирилишича, ўзбекистонлик М.В. ўтган йили ишлаш мақсадида Рига шаҳрига келган. Аммо соғлиғида кузатилган муаммолар сабабли шу йил январь ойи ўрталарида Рига шаҳридаги шифохоналардан бирига даволаниш мақсадида жойлаштирилган. Қийин ҳаётий вазиятга тушиб қолган фуқаро Ўзбекистон элчихонасига мурожаат қилиб, ватанга қайтиш ва шифохона билан юзага келган муаммоларни ҳал этишда амалий ёрдам беришни сўраб мурожаат қилди.
Дипломатлар шифохона масъуллари билан учрашув ўтказиб, барча муаммоларни ҳал этиш бўйича келишиб олди. Шунингдек, фуқаронинг Ўзбекистонга қайтиши билан боғлиқ ҳужжатларни расмийлаштиришда амалий ёрдам кўрсатилди.
Беморнинг даволаниши ва ватанга қайтиши билан боғлиқ харажатлар мамлакат элчихонаси ҳамда Халқаро миграция ташкилоти Рига офиси кўмагида ижобий ҳал этилди. Фуқаро Uzbekistan Airways миллий авиакомпаниясининг Рига—Тошкент йўналишидаги самолёти билан Ўзбекистонга кузатиб қўйилди.
Бундан аввал Ўзбекистоннинг Қозон шаҳридаги Бош консулхонаси узоқ вақт давом этган тадбирлар натижасида Россиянинг Волгабўйи федерал округидаги Мордовия жазони ижро этиш муассасасида жазо ўтаётган Ўзбекистон фуқароларининг вояга етмаган болаларини ватанга қайтариш жараёнларини муваффақиятли якунлаган эди.
Шунингдек, Хитойда вақтинча истиқомат қилиши давомида мураккаб ҳаётий вазиятга тушиб қолган 11 нафар ўзбекистонлик хотин-қиз ватанга қайтарилганди.
Хориждан Ўзбекистонга қайтарилган болалар
Август—сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди. Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди. Декабрда Россияда ота-она қарамоғисиз қолган 15 нафар бола Ўзбекистонга қайтарилди.
Изоҳ (0)