Ўзбекистонда ташқи қарз миқдори сезиларли ортиб бораётганига давлат бюджетида кузатилаётган тақчиллик сабаб бўлмоқда. Бу ҳақда 23 январь куни Тошкент шаҳрида ўтказилган матбуот анжуманида Марказий банк раиси Тимур Ишметов маълум қилди, дея хабар берди “Дарё” мухбири.
Журналистлар билан мулоқотда Марказий банк раҳбариятига мамлакатда ташқи қарз ортиб бориши хатарлари ҳақида савол берилди.
2024 йилда давлат ташқи қарзи жалб қилишнинг қонун билан белгиланган йиллик лимити 5 миллиард доллар эди. Бироқ йил якунида бу миқдор 7,3 миллиард долларга оширилди. 2025 йилда яна 5,5 миллиард доллар ташқи қарз олиниши белгиланган.
Марказий банкнинг янги тайинланган раиси Тимур Ишметовнинг айтишича, қарз кўпайиши бюджет тақчиллиги билан боғлиқ.
“Ҳукумат қарз масаласи бўйича ишларни тартибга солган. Қарз юки мўтадил даражада сақлаб келинмоқда. Давлат қарзи ошиши бу бевосита бюджет тақчиллиги билан боғлиқ. Жорий йил учун тақчиллик 3 фоиз даражасида тасдиқланган бўлса, уни ёпишга ташқи қарзнинг 2,5 миллиард доллари ажратилиши белгиланган. Агар тақчиллик ошмаса, ташқи қарзни оширишга муҳтожлик бўлмайди. Шу билан бирга, ташқи қарзнинг валюта бозорига таъсири бор. Бу бўйича катта бир хатарлар кўрмаяпман. Мазкур масалада ҳукуматда қатъий ёндашувлар шаклланиб бўлган”, деди раис.
2024 йил III чорагида Ўзбекистон давлат қарзи 39,1 миллиард долларни (ялпи ички маҳсулотга нисбатан 35 фоиз) ташкил этган. Шундан ташқи қарз 32,2 миллиард доллар, ички қарз салкам 6,9 миллиард доллар бўлган. Йил якуни бўйича ҳисобот ҳали эълон қилинмаган.
Прогнозларга кўра, 2025 йил охирида давлат қарзи миқдори 45,1 миллиард долларга етиши (ЯИМга нисбатан 36,7 фоиз) мумкин.
Ўтган 2023 йилда Ўзбекистон бюджети тақчиллиги 59,2 триллион сўмни ёки ЯИМга нисбатан 5 фоизни ташкил этган. Бу мамлакат учун мутлақ рекорд кўрсаткичдир. 2024 йилда ҳам дефицит давом этиб, 57,2 триллион сўм (ЯИМга нисбатан 4 фоиз) бўлиши прогноз қилинган.
Изоҳ (0)