Давлат хавфсизлик хизмати фуқароларни АҚШга ноқонуний йўллар билан юборишга уринган маҳаллий ҳамда хорижий фуқароларнинг ҳаракатларига чек қўйилганини маълум қилди.
ДХХ томонидан Бош прокуратура ҳузуридаги Иқтисодий жиноятларга қарши курашиш департаменти ҳамкорлигида Тошкент шаҳрида ўтказилган тезкор тадбирда Самарқанд шаҳрида яшовчи, 1992 йилда туғилган фуқаро хорижий фуқаронинг ишончига кириб, уни ва 4 нафар оила аъзоларининг ҳар бирини 30 минг доллардан, жами 150 минг доллар эвазига Туркия орқали АҚШга ишлаш учун юборишини айтган.
Виза ҳужжатларини мансабдор танишлари орқали тайёрлаб бериши учун олдиндан 15 минг доллар олган вақтида ушланган.
Тошкентда вақтинча истиқомат қилиб келаётган 2004 йилда туғилган хорижий фуқаро бошқа чет эт фуқаросининг ишончига кириб, унга Буюк Британия сохта фуқаролик паспортларини тайёрлатиб бериш имконияти борлигини айтган. Сўнгра, мазкур сохта паспортлар ёрдамида АҚШга Туркия ва БАА орқали уларни жўнатиб юбориши эвазига жами 25 минг доллар талаб қилган.
Ўтказилган тезкор тадбирлар натижасида ушбу фуқаро олдиндан 12,500 доллар олган вақтида ушланган. Шунингдек, унинг яшаш хонадонидан қалбаки паспорт ва ID-карталар ҳам ашёвий далил сифатида олинган.
Ҳар иккала ҳолатлар юзасидан Жиноят кодексининг 168-моддаси (фирибгарлик) 4-қисми “а” банди ва 28,211-моддаси (пора бериш) 3-қисми “а” банди билан жиноят ишлари қўзғатилиб, тергов ҳаракатлари олиб борилмоқда.
Ўзбекистондан АҚШга ноқонуний бориш билан боғлиқ фирибгарлик ҳолатлари ҳақида хабар берилишига қарамай, бундай ҳолатлар тез-тез қайд этилмоқда. Май ойининг бошларида Жиззахда фуқарони Мексика орқали АҚШга жўнатмоқчи бўлган шахс ушланганди. 26 март куни Сирдарё ва Навоий вилоятларида 38 минг ва 14 минг доллар эвазига АҚШга ишга юборишни ваъда қилган шахслар ушланди. Ундан аввал Тошкентнинг Чилонзор туманида АҚШга ишга юбориш учун 40 минг доллар олган киши ушланганди.
Изоҳ (0)