“Биринчи марта ваъда қилган эҳсонимни бермаганимдан маза қилдим”. Марат Ҳамдамов Сабрина Жабборовага мурожаат йўллади

Тадбиркор Марат Ҳамдамов актриса Сабрина Жабборованинг унга уй берилмагани ҳақидаги сўзларига муносабат билдирди.

“Бир неча ойлар олдин ижтимоий тармоқларда айнан шу қизимизга доир видеолар тарқалди, шу пайтда Туркияда эканлар, ёрдам бериш ниятида эканлигимни айтиб Telegram орқали боғландим, Ўзбекистонга қайтганингизда ёзиб қўйинг, дедим.

Орадан бир оз вақт ўтди, улар Ўзбекистонга қайтиб келди ва менга Telegram орқали ёздилар, паспорт нусхаларини юбориб қўйишларини сўрадим.

Ўзи бундай нарсаларга, ‘театр’ ва пиарларга тоқатим йўқ, аслида, хонадонни бериш жараёнини ҳам сир сақлагандик, лекин кўпчилик нотўғри тушунгани учун ҳозир изоҳ бериб ўтишга мажбурман.

Хуллас, менга паспорт нусхаларини юбордилар, лекин биз ўша пайтда 10-, 11-, 12 май кунлари компаниямиз томонидан акция эълон қилган эдик, шу сабабли мен бандроқ эдим. Менинг айбим Сабрина юборган SMS-хабарни 1 кундан кейин ўқидим. Кейин телефон рақамлари йўқлиги учун телефон рақамингизни беринг, сизга сотув бўлими ходимлари алоқага чиқади, деб сўрадим. Шу саволни берганимдан кейин менга жавобан: бу адвокатимнинг телефон рақами, нима саволингиз бўлса, адвокатим орқали алоқага чиқинг, деган хабар келди. Шунда озгина ҳайратландим, нега адвокат, деб тушунмадим.

Ўзи аслида Аллоҳ кўнглингизга солмаса, бировга минг сўм ҳам бера олмайсиз, аммо Аллоҳ кўнглингизга солса, охирги нарсангизни ҳам беришинингиз мумкин. Шу уй синглимизга насиб қилмаган экан.

Мен шу куни эрталаб интервьюни кўриб қолдим, бу интервьюда қандайдир нотаниш аёл гўёки менинг пиар қилганимни иддао қилибди ва шундай муомала қилишяптики, худди мен мажбурман уларга уй беришга, ваҳоланки, менинг улардан қарзим йўқ, шунчаки ёрдам тариқасида уй бермоқчи эдим.

Кейин бундан ташқари, кўп нарсалар эшитдим, унга чуқурлашмоқчи эмасман. Халқ томонидан йиғиб берилган пуллар ўзбошимчалик билан бошқа томонга сарфланганини эшитганимдан кейин буларнинг ичидаги ғазаб, менга бўлган нотўғри муомаласини кўриб хонадонни бермасликка қарор қилдим. Чунки менинг фикрим бўйича эҳсон қилишга арзийдиган инсон деб топмадим. Бу видеони кўриб хафа бўлманглар, Аллоҳ насиб қилмабди.

Балки озгина сабрлироқ бўлганингизда, рақамингизни сўраганимда берганингизда, ҳаммаси бошқачароқ бўлар эди. Энди ўзингизни шундай тутяпсизки, худдики сиз Голливуд юлдузисиз, биз сизга уй берганимиз учун бизнинг бизнесимиз зўр бўлиб кетади ва биз қанақадир худди реклама учун қилиб олганмиз.

Аслида, мен сиз ҳақингизда гапиришни ҳам ният қилмаганман ва албатта мен пиар қилишни истаганимда, уйни сизга тантанали равишда топширардим, биз умуман бу ҳақда гапирмадик, сир сақладик, шунчаки ёрдам учун эди. Лекин сизнинг қилаётган муомалангиз менинг кўнглимни совитди ва уйни бермасликка қарор қилдим.

Лекин шу синглимиз учун аталган уйни, Худо хоҳласа, июнь ойида энг муҳтож оилага тақдим қиламан. Уйни боқувчисини йўқотган, уйсиз, вояга етмаган етим фарзандлари бўлган ёлғиз онага топшираман.

Майли, халқ мени лафзсизликда айбласин. Лекин тўғрисини айтадиган бўлсам, умримда биринчи марта мана шу ваъда қилган эҳсонимни бермаганим учун маза қилдим, чунки Аллоҳ юзингизни очди”, дейди тадбиркор.

Аввалроқ Сабринанинг адвокати Зебохон Комилова тадбиркор Марат Ҳамдамов томонидан эҳсон қилинган уй Сабринага ҳали берилмагани ҳақида айтиб ўтган эди:
“Интернетдаги ҳамма гапларга ҳам ишониб бўлмайди, Марат Хайруллаевичга Сабринанинг телефонидан боғланмоқчи бўлдик, афсуски, уни қора рўйхатга киргизиб қўйишибди, натижада улана олмадик. Бу Марат Хайруллаевич шунчаки интернетда машҳурликка эришиш учун қилинган пиар ҳисобланади”, деган эди адвокат. 

15 май куни Жиноят ишлари бўйича Мирзо Улуғбек тумани судида Озода Нурсаидова қўшиғига клип суратга олинаётганда содир бўлган мудҳиш автоҳалокатнинг суд жараёнлари бошланди. 

“Дилбарим” қўшиғига клип суратга олиш жараёнида Сабрина Жабборовани 16 ёшли актриса “Гелик”да босиб кетган эди. Сабрина Тошкент шаҳрида муваффақиятсиз операция қилинган, шундан сўнг бир оёғи калта бўлиб қолган эди.  У ўзи билан юз берган воқеа ҳақида ижтимоий тармоқларда сўзлаб берганидан кейин кўнгиллилар томонидан унга жами 367 миллион сўм йиғиб берилган эди. Шундан сўнг актриса Истанбул шаҳрида қайтадан операция қилиниб, тўғри юра бошлади.