Украина президенти Владимир Зеленский Ўзбекистондаги учта компанияга қарши санкция қўллади. Тегишли фармон президент идораси сайтида эълон қилинди.
Маълум қилинишича, Россиянинг 67 та компанияси ва Хитой, Эрон, Ўзбекистон ва Беларусда рўйхатдан ўтган еттита компанияга санкциялар қўлланилган. Россиянинг 58 нафар фуқароси чекловга учраган.
Бир қатор металлургия, машинасозлик, самолёцозлик ва кимё корхоналари, шунингдек, Киевда Россия ҳарбий-саноат комплекси билан боғлиқ бўлган бир қанча конструкторлик бюролари ўн йил муддатга санкциялар остига тушган. Ўзбекистон компаниялари орасида қуйидагилар тилга олинган:
- Тошкентда жойлашган Mercury Renaissance масъулияти чекланган жамияти қўшма корхонаси. У 2016 йилда рўйхатга олинган бўлиб, қурилиш техникаси ва жиҳозлари ижараси ҳамда лизинг асосида фойдаланиш билан шуғулланади. Таъсисчилар Муминов Рустам (60%) ва Глухов Михаил (40%).
- Жиззахда жойлашган Raw Маterials Cellulose масъулияти чекланган жамияти. 2017 йил рўйхатга олинган ва ёғоч массаси ҳамда целлюлоза ишлаб чиқаришга мўлжалланган. Таъсисчи Уткина Лариса Михайловна.
- Фарғона шаҳридаги “Фарғона кимё заводи” масъулияти чекланган жамияти 2012 йил рўйхатга олинган. У ҳам ёғоч массаси ва целлюлоза ишлаб чиқариш билан шуғулланади. Таъсисчиси Mercury Renaissance.
Санкциялар 10 йилга жорий этилган. Улар Украина ҳудудидаги активларни музлатиш, лицензияларни бекор қилиш, интеллектуал мулк объектларини ўтказишни тақиқлаш, савдо келишувлари, маданий алмашинувлар, илмий соҳадаги ҳамкорликни тўхтатишни англатади.
Изоҳ (0)