Украина президенти Владимир Зеленский Миллий хавфсизлик ва мудофаа кенгашининг “Шахсий махсус иқтисодий ва бошқа чекловчи чораларни қўллаш тўғрисида”ги қарорига мувофиқ 147 нафар фуқарога, шунингдек, 303 та юридик шахсга нисбатан санкция қўллаш тўғрисида фармонларни имзолади.
Санкциялар рўйхатига киритилганлар орасида Ўзбекистон корхоналари ва фуқаролари ҳам бор. Хусусан, Akkermann Cement CА (Оҳангарон), “Оҳангаронцемент” АЖ, шунингдек, Нарзиева Наргиза Эркиновна, Носирхўжаев Шоҳрух Олимжонович “қора рўйхат”га тушган.
Санкциялар активларни блоклаш, мол-мулкка эгаликни тақиқлаш, савдо операцияларини чеклаш, иқтисодий ва молиявий мажбуриятларни тўхтатиб туриш, қимматли қоғозлар билан операцияларни тўлиқ ёки қисман тақиқлаш каби кўплаб чораларни ўз ичига олади.
Зеленскийнинг фармонида санкция остига тушган фуқаролар ва компаниялар айнан қайси қонунларни бузгани ҳақида маълумот берилмаган. Аммо Украина президенти ўзининг кечки видеомурожаатида санкцияга учраганлар бевосита Россия агрессияси учун ишлашини айтди.
Ўзбекистонликлардан ташқари Россия, Украина, Руминия, Кипр, Буюк Британия, Лихтенштейн, Австрия, Швейцария ва Беларусь фуқаролари ҳам санкцияларга дучор бўлган. Юридик шахслар орасида санкциялар рўйхатига авиация, қурилиш ва технология соҳаларида фаолият юритувчи, хусусан, Россия, Кипр, БАА ва Хитойда рўйхатдан ўтган компаниялар киритилган.
Изоҳ (1)
яхши одам эмасда шу