Жаҳон банки Ижрочи директорлар кенгаши Ўзбекистонга қайта тикланувчи энергия манбаларини тақсимлаш электр тармоқларига интеграция қилиш ва мамлакатнинг устувор ҳудудларида электр таъминоти ишончлилигини оширишга қаратилган дастурни амалга ошириш учун 100 млн доллар миқдорида имтиёзли кредит ажратишни маъқуллади. Бу ҳақда ЖБ матбуот хизмати хабар берди.
Дастурни амалга ошириш учун “Ҳудудий электр тармоқлари” АЖ ўз маблағлари ҳисобидан қўшимча 50 млн доллар ажратади.
2024 йил ҳолатига кўра, Ўзбекистонда электр энергиясини тақсимлашда техник йўқотишлар тахминан 13 фоизни ташкил этади. Асосий сабаб – эскирган ва юкламаси ошиб кетган инфратузилма. Тақсимлаш тармоқлари объектларининг 50 фоиздан ортиғи 30 йилдан ортиқ эксплуатация қилинмоқда, бу уларнинг норматив хизмат муддатидан анча кўпроқ бўлиб, авариялар ва электр таъминотидаги узилишларга олиб келади.
Ўзбекистон 2030 йилгача қайта тикланувчи энергия манбаларидан электроэнергия ишлаб чиқариш ҳажмини 25 гигаваттга (ГВт) етказишни режалаштирмоқда. Бироқ, тақсимлаш тармоқларини зудлик билан модернизация қилмасдан, қайта тикланадиган энергиянинг янги етказиб берувчиларини ушбу тармоқларга улаш имкони бўлмай қолади.
Жаҳон банки ва “ҲЕТ” АЖ томонидан биргаликда молиялаштириладиган янги дастур доирасида 150 млн долларни ўзлаштириш режалаштирилган. Дастур доирасидаги асосий чора-тадбирларга қуйидагилар киради:
- 6 000 км узунликдаги паст кучланишли электр узатиш тармоқларини қуриш ва модернизация қилиш;
- умумий қуввати 250 мегаволт-ампер (МВА) бўлган 1 200 та тақсимлаш трансформаторини алмаштириш ва ўрнатиш;
- “ҲЕТ” АЖ тармоқларида электр энергиясининг тижорат йўқотишларини камайтиришга ёрдам берадиган 150 мингта “ақлли” ҳисоблагичларни улаш;
- тақсимлаш тармоқлари фаолиятини автоматлаштириш ва рақамлаштиришни таъминлаш учун 4 мингта маълумотлар концентраторини ўрнатиш, бу уларни замонавий ва самарали тизимга айлантиради.
2024 йилнинг февралида Шавкат Мирзиёевнинг Хоразм вилоятига ташрифи чоғида Тупроққалъа туманида Voltalia компанияси томонидан қуввати 100 мегаваттлик қуёш электр станцияси қурилишини бошлаш маросими бўлиб ўтганди. Бу Хоразмдаги илк шундай йирик лойиҳадир. Бу лойиҳа ишга тушса, Хоразм вилоятида электр энергияси ишлаб чиқариш қувватлари 30 фоизга ошиб, 424 мегаваттга етади. Хусусан, Тупроққалъа туманининг электрга бўлган йиллик 135 миллион киловатт соат талаби тўлиқ қондирилади.
Франциянинг Voltalia компанияси қайта тикланувчи энергетика соҳасидаги иншоотларни қуришда бой тажрибага эга. Ҳозирда дунёнинг 20 мамлакатида умумий қиймати 10 миллиард доллардан зиёд инвестиция лойиҳаларини амалга оширмоқда.
Изоҳ (0)