Ижтимоий тармоқларда «ўтган йили Жаҳон банки томонидан Ўзбекистонда свет ўчмаслиги учун ажратилган 423 миллион доллар қаерда?» мазмунидаги саволлар тарқалди. Энергетика вазирлиги бунга муносабат билдирди.
Вазирликнинг билдиришича, Жаҳон банкидан кредит маблағлари 2022—2026 йиллар давомида жалб қилинади. Ҳозирги пайтда кредит маблағи жалб қилинмаган.
Жаҳон банки кўмагида «Электр энергетика соҳасини трансформация қилиш ва электр энергиясини барқарор узатиш» лойиҳасини амалга ошириш режалаштирилган бўлиб, Халқаро тараққиёт ассоциацияси (Жаҳон банки гуруҳи) томонидан 380 млн доллар, Яшил иқлим жамғармаси томонидан эса 43 миллион доллар миқдорида кредит ажратилиши режалаштирилган.
Ушбу лойиҳа 2022—2026 йилларда амалга оширилиши режалаштирилган бўлиб, лойиҳа доирасида республика бўйлаб 22 та эскирган юқори кучланишли подстанция реконструкция қилинади. Бунинг натижасида магистрал тармоқларнинг қувват ўтказиш имкони 1036 МВАга ортади.
Шунингдек, 2022—2026 йиллар давомида 1602 МВА қувватга эга бўлган янги 500 кВли рақамли подстанция ва 285 километр узунликдаги юқори кучланишли электр узатиш тармоқлари қурилади.
Ушбу лойиҳанинг муҳим стратегик таркибий қисми SCADA ва EMS тизимини амалга ошириш ҳисобланади ва бу энергия тизимида диспетчерлик ва мониторинг қилиш имконини беради.
Бундан ташқари, «Ўзбекистон миллий электр тармоқлари» АЖни келажакда трансформация қилиш учун Enterprise Recourse Planning (ERP) тизимини жорий етиш режалаштирилган.
Ҳозирда ушбу лойиҳаларни «тайёр ҳолда топшириш» шарти асосида Пудратчиларни аниқлаш учун Жаҳон банки талабларига мувофиқ Халқаро тендер савдоларини ўтказиш ишлари олиб борилмоқда.
Жумладан, бугунги кунда Республика бўйлаб SCADA тизимини жорий қилиш ва 500 кВли «Халқа» подстанциясини қуриш бўйича Халқаро тендер савдолари эълон қилинган ҳамда Сирдарё ва Тошкент вилоятларини боғловчи юқори кучланишли ҳаво тармоғи учун тендер таклифлари баҳолаш ҳисоботи Жаҳон банки билан келишилмоқда.
Магистрал тармоқ подстанцияларини модернизация қилиш лойиҳасининг 2-фазаси учун тендер савдолари 2022 йилнинг декабрь ойидан бошлаб босқичма-босқич эълон қилиб борилади. Бош пудратчилар аниқланганидан сўнг, Жаҳон банкининг кредит маблағларидан фойдаланиш бошланади.
Мавзуга доир:
Изоҳ (0)