Москвада ўтказиладиган Ғалабанинг 80 йиллигига бағишланган тантанали тадбирларда қатнашиш учун ўттизга яқин хорижий давлат раҳбарлари Россияга ташриф буюради. Бу ҳақда Россия Федерацияси президентининг ёрдамчиси Юрий Ушаков маълум қилди.
“Кўплаб хорижий меҳмонлар таклиф этилган ва биз Ғалаба парадида таклиф қилинган мамлакатларнинг 29 нафар раҳбари иштирок этишини кутмоқдамиз”, дейди Ушаков.
Қайд этилишича, парадда Озарбайжон, Арманистон, Беларусь, Қозоғистон, Қирғизистон, Тожикистон, Туркманистон, Ўзбекистон, Абхазия, Босния ва Герсеговина, Бразилия, Буркина Фасо, Венесуэла, Вьетнам, Гвинея Бисау, Миср, Зимбабве, Хитой Халқ Республикаси, Конго, Куба, Лаос, Мўғулистон, Мьянма, Фаластин, Сербия, Словакия, Экваториал Гвинея, Эфиопия ва Жанубий Осетия каби мамлакатларнинг олий даражадаги раҳбарлари иштирок этади. Шунингдек, Ҳиндистон, Никарагуа ва Жанубий Африка Республикасининг “етарлича юқори даражада”ги шахслари қатнашади.
Ушаковнинг таъкидлашича, парад ва байрам тадбирларида иштирок этиш учун ШҲТ, МДҲ, КХШТ, Ислом ҳамкорлик ташкилоти, Россия ва Беларусь иттифоқ давлати, Африка иттифоқи комиссияси бош котиблари, Янги тараққиёт банки президенти ҳам таклиф этилган.
“Парадга мамлакатимизда аккредитациядан ўтган барча дипломатик ваколатхоналар раҳбарлари таклиф этилган. Шунингдек, бир қатор давлатларнинг мудофаа идоралари раҳбарлари ҳам таклиф қилинган ва биз 34 та давлат ўз мудофаа вазирликлари вакилларини юборишини кутмоқдамиз”, дейди Россия президенти ёрдамчиси.
Маълум қилинишича, Қизил майдонда 13 та мамлакатдан, хусусан, Озарбайжон, Вьетнам, Беларусь, Миср, Қозоғистон, Хитой, Қирғизистон, Лаос, Мўғулистон, Мьянма, Тожикистон, Туркманистон ва Ўзбекистондан келган ҳарбийлар иштирокида парадлар ўтказилади. Шунингдек, парадда Арманистон, Исроил, Мўғулистон ва АҚШ каби бир қатор хорижий давлатлардан фахрийлар иштирок этиши режалаштирилган.
Айни пайтга қадар Хитой Халқ Республикас раиси Си Цзиньпин, Сербия президенти Александ Вучич, Монголия президенти Ухнаагийн Хурельсухлар Москвага етиб борган.
Польша, Литва ва Латвия 9 май куни Москвада бўлиб ўтадиган Ғалаба парадида иштирок этиши режалаштирилган Сербия президенти Александр Вучич ва Словакия бош вазири Роберт Фицолар бўлган самолётларнинг ўз ҳаво ҳудуди орқали учишига рухсат бермагани хабар қилинганди.
Изоҳ (0)