Қирғизистон президенти Садир Жапаров Қизил майдондаги Ғалаба парадидан сўнг бўлиб ўтган МДҲ давлатлари раҳбарларининг Кремлдаги норасмий тушлигида қатнашмади. Буни Россия оммавий ахборот воситаларида чоп этилган фото ва видеоматериаллар тасдиқлайди.
Қизил майдондаги парад маҳаллий вақт билан соат 10:00 да (Тошкент вақти билан 12:00 да) бошланди, шундан сўнг президентлар Александр боғидаги номаълум аскар қабрига гул қўйди ва Иккинчи жаҳон урушида ҳалок бўлганлар хотирасини бир дақиқалик сукут билан ёдга олди.
8 май куни Россия президенти матбуот котиби Дмитрий Песков давлат раҳбарлари ташрифи бўйича режани айтиб, МДҲ давлатлари етакчилари Путин билан норасмий нонуштага боришини маълум қилганди.
Кремль томонидан эълон қилинган тасвирларда норасмий нонуштага фақат Россия, Қозоғистон, Ўзбекистон, Тожикистон, Туркманистон президентлари ва Арманистон бош вазири борганини кўриш мумкин. Шу билан бирга, президентлик столи атиги олти кишига ёзилган.
Таъкидлаш керакки, нонуштада Беларусь президенти Александр Лукашенко ҳам бўлмаган. Беларусь раҳбарининг тадбирда иштирок этмаслиги сабаби унинг соғлиғи билан боғлиқ. Лукашенко Москвадаги парадда ўзини ёмон ҳис қилган, оммавий ахборот воситалари Беларусь президентининг қўлига бинт боғланганига эътибор қаратган.
Қирғизистон президенти нега тушликда иштирок этмади?
Садир Жапаровнинг матбуот котиби Эрбол Султонбоев бу бўйича маълумот берди. Унга кўра, Қирғизистон президенти Россия бош вазири Михаил Мишустин билан музокарага борган.
“8 май куни президент Садир Жапаров МДҲ давлатлари раҳбарлари учун норасмий зиёфатда иштирок этди. 9 май куни Қизил майдондаги парад тугагандан сўнг Қирғизистон делегацияси расмий ташриф доирасидаги тадбирга — Россия бош вазири Михаил Мишустин билан музокараларга борди”, — деди Эрбол Султонбоев.
Изоҳ (0)