Россия президенти Владимир Путин унинг мамлакати Украинага нисбатан деярли икки баравар кўпроқ ҳарбий хизматчиларни фронтга юбораётганини айтди. Бу ҳақда “Кремлин.ру” хабар берди.
Путиннинг таъкидлашича, Украина ҳукумати “мажбурий сафарбарлик”ни амалга ошираётган бир вақтда, Россияда одамлар урушга “ўз ихтиёри” билан кетмоқда.
Улар зўрға 30 минг кишини сафарбар қилаётган бўлса, бизга ойига 50-60 минг йигит ўз ихтиёри билан келмоқда, деди у.
Бироқ бу баёнотлар Ғарб разведка хизматларининг ҳисоб-китобларига мос келмайди. АҚШ ва Европа Иттифоқи разведкаси Россия армиясига ҳар ойда чақирилаётган ҳарбийлар сонини 30–40 минг атрофида деб баҳолаган. Таҳлилчиларга кўра, армияга қўшилиш учун асосий рағбат — катта миқдордаги пул мукофотлари бўлиб қолмоқда. Бундан ташқари, қамоқхоналардан маҳбусларни сафарбар этиш ишлари ҳам давом этмоқда.
Бироқ бу чоралар фақат фронтдаги катта йўқотишларни қоплаш учун етарли, холос, дейилади хабарда.
Британия разведкаси уруш бошланганидан бери Россия армияси орасида ҳалок бўлган ва яраланганлар сонини қарийб бир миллион кишига баҳолаган. Шунга қарамай, Россия муҳим ҳудудий ютуқларга эриша олмаган. 2024 йил якунида Россия қўшинларининг олдинга силжиши Украина ҳудудининг атиги 0,5 фоизини ташкил қилган.
Россия ёллашнинг ҳозирги суръатини узоқ вақт сақлаб қола олмайди. Москва жанговар ҳаракатларни ҳозирги даражада давом эттириши учун тахминан 12–16 ой вақти бор, дейди Американинг Урушни ўрганиш институти (ISW)даги Россия бўйича таҳлилий гуруҳ раҳбари Жорж Баррос.
У Россияни иқтисодий муаммолар, ресурслар танқислиги ва инсон салоҳиятининг чеклангани тўхтатиб турганини айтган.
The Economist нашрига кўра, йўқотишларнинг ортиб бориши ва инсон ресурсларининг чеклангани фонида Россия Бош штаби ҳамда Мудофаа вазирлиги сафарбарликнинг янги тўлқинини бошлаш учун Кремлга босим ўтказмоқда. Ҳарбийлар бу жараённи 2024 йил май ойида бошлашни таклиф қилган.
Путин 2022 йил сентябрида “қисман сафарбарлик” эълон қилган эди. Шундан сўнг турли манбаларга кўра, 650 мингдан 1,1 миллионгача россиялик мамлакатни тарк этган. Тҳе Белл нашрининг 70 та давлат миграция хизматлари маълумотларига таянган ҳисоботига кўра, 2024 йил июль ҳолатига келиб уларнинг камида 666 минг нафари Россияга қайтмаган.
Изоҳ (0)