Россияда 130 минг киши мажбурий ҳарбий хизматга чақирилади — Путин фармони 

Россия президенти Владимир Путин муддатли ҳарбий хизматни ўташ тўғрисидаги фармонни имзолади. Бу ҳақда “Коммерсант” хабар берди.

Ҳужжатга кўра, кузда муддатли ҳарбий хизматга 130 минг киши танлаб олинади. Унга 18 ёшдан 27 ёшгача бўлган, соғлиғи бўйича яроқли ва захирада бўлмаган фуқаролар чақирилади. Кузги чақирув 2023 йил 1-октябрда бошланиб, 31 декабрда тугайди.

Россия Қуролли Кучларининг Бош ташкилий ва сафарбарлик бошқармаси бошлиғи ўринбосари Владимир Симлянский ҳарбий хизматга чақирилувчилар “янги ҳудудларга” урушда қатнашиш учун юборилмаслигини айтди. 

“Ҳарбий хизматни ўтаб бўлгач, улар зудлик билан бўшатилади ва уйига жўнатилади”, — деди у.

1-октябрдан бошлаб Россияда ҳарбий хизматга чақирув бўйича ҳарбий комиссияга узрсиз сабабсиз келмаганлик учун жарима миқдори оширилади. Максимал жарима миқдори 30 минг рублни (3 миллион 754 минг сўм) ташкил қилади. Тегишли қонунни 31 июль куни Владимир Путин имзолаган.

• 2023 йил баҳорги муддатли ҳарбий хизматга 147 минг киши чақирилган. Тегишли фармонни Путин 30 март куни имзолаган.
• 2022 йили кузги муддатли ҳарбий хизматга чақирув бир ой кейинроқ — 1 ноябрдан бошланган эди. Ўшанда 120 минг киши ҳарбий хизматга чақирилган.