Германия муайян ҳолатларда Россия армияси дезертир (қочоқ)ларига ва «Путин режимига қарши бўлганлар»га бошпана беришга тайёр, бу ҳақда мамлакат ички ишлар вазири Нэнси Фезер маълум қилди, деб ёзади Meduza.
«Одатда, шафқатсиз репрессиялар хавфи остида бўлган дезертирлар Германияда халқаро ҳимояни қўлга киритади. Путиннинг режимига мардлик билан қарши чиқадиган ва шу туфайли ўзини катта хавф остига қўядиган ҳар бир киши сиёсий таъқиб сабабли Германиядан бошпана сўраши мумкин», — деди у.
Германиянинг Pro Asyl ҳуқуқни ҳимоя қилиш ташкилоти ҳам шунга ўхшаш баёнот билан чиқиб, Евроиттифоқнинг барча мамлакатларини мажбурий сафарбарликдан қочишга уринаётган барча россияликларга бошпана тақдим этишга чақирди.
«Евроиттифоқ қонунчилигига кўра, халқаро ҳуқуққа зид бўлган урушдан қочаётганлар бошпана ва ҳимоя олиш ҳуқуқига эга. Шу маънода Германия ва Европа Россиянинг агрессив урушига қарши чиққан одамларни қоғозбозликларсиз қабул қилишни ташкиллаштириши керак», — дея маълум қилди ташкилот.
Pro Asyl’нинг баёнотини Германия Эркин-демократик партияси ва «яшиллар» партияси қўллаб-қувватлаган.
Айни вақтда Чехия Ташқи ишлар вазирлиги мамлакат сафарбарликдан қочаётган Россия фуқароларига гуманитар визалар бермоқчи эмаслигини маълум қилди.
Россияда нималар бўляпти?
21 сентябрь куни Россия президенти Владимир Путин Россияда қисман сафарбарлик эълон қилиш ҳақидаги фармонни имзолади. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади.
Шундан кейин Россияда сафарбарлик эълон қилинишига қарши «Change.org» сайтига жойланган петицияни ўн минглаб одам имзолади.
Сафарбарлик эълон қилинганидан кейин бир неча дақиқалар ичида Москвадан Истанбулга, Тбилисига ва Ереванга тўғридан-тўғри рейслар учун чипталар тўлиқ сотилиб кетган. Шунингдек, Москвадан Тошкентга рейслар чипталари ҳам қолмаган. Россиянинг Қозоғистон ва Грузия билан чегараларида бир неча километрлик навбатлар юзага келди.
Изоҳ (0)