Россиядаги қисман сафарбарлик доирасида 3 минг нафаргача тиббиёт ходимлари чақирилиши мумкин. Бу ҳақда Давлат думасининг соғлиқни сақлаш бўйича қўмитаси раҳбари Дмитрий Хубезов «Интерфакс»га маълум қилди.
Хубезовнинг аниқлик киритишича, бу рақамлар соғлиқни сақлаш ва мудофаа қўмиталарида муҳокама қилинган.
Россияда тиббиёт ходимларининг барчаси (эркакларга ҳам, аёлларга ҳам) учун ҳарбий хизмат мажбурий ҳисобланади.
21 сентябрь куни Россия президенти Владимир Путин қисман сафарбарлик эълон қилиш ҳақидаги фармонни имзолаган эди. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.
Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади. Хизмат ўтаб бўлган, ҳарбий-ҳисоб мутахассислиги ва жанговар тажрибага эга бўлганларгина чақирилади. Талабалар ва муддатли ҳарбий хизматчилар сафарбар этилмайди, деган эди Шойгу.
Армияга чақириладиган одамлар сони кўрсатилган банд сафарбарлик ҳақидаги фармонда махфийлаштириб қўйилган. «Новая газета. Европа» нашри хабарига кўра, ушбу бандда бир миллион киши армияга чақирилиши ҳақида айтилади. Meduza’нинг федерал вазирликлардан бирига яқин манбаси айтиб беришича, армияга 1,2 миллион кишини чақириш режалаштирилмоқда.
Изоҳ (0)