Иқтисодиёт ва молия вазирлиги 15 октябрь куни “Менинг боғчам” лойиҳасининг овоз бериш босқичи бошланганини эълон қилди.
“Очиқ бюджет” ахборот порталида “Менинг боғчам” лойиҳаси доирасида 2025 йил учун ижтимоий ва ишлаб чиқариш инфратузилмасини ривожлантириш бўйича давлат дастури учун янги қуриладиган ҳамда реконструкция қилинадиган боғчаларга аниқлик киритиш бўйича овоз берилади.
Овоз бериш жараёни “Бир фуқаро — бир овоз” тамойили асосида ўтказилади ва 25 октябрь 10:00 гача давом этади.
Лойиҳалар рўйхати билан қуйидаги ҳавола орқали танишиш мумкин. Унда 451 та ташаббус келтирилган бўлиб, овоз беришда ғолиб деб топилган лойиҳалар учун жами 397 550 040 800 сўм ажратилади.
Янги “Менинг боғчам” лойиҳаси орқали мамлакатда боғчалар қуриш ва мавжудларини реконструкция қилишда жамоатчилик иштирокини таъминламоқчимиз. Бу бюджет маблағлари самарали сарфланишида муҳим аҳамиятга эга, деган эди Иқтисодиёт ва молия вазирлиги вакили Сирожиддин Қутлиев “Дарё” мухбири билан суҳбатда.
2025 йилги давлат бюджетидан боғчалар қуриш, реконструкция қилиш ва таъмирлашга ажратиладиган маблағларнинг 50 фоизи “Менинг боғчам” лойиҳаси доирасида сарфланади.
Изоҳ (0)