“Давр банк” АТБнинг ташқи рекламасида кредит бўйича қўшимча шартлар ва муҳим маълумотлар кўрсатилмагани аниқланди. Бу ҳақда Рақобат қўмитаси хабар бермоқда.
Рақобат қўмитаси томонидан ўтказилган ўрганишлар давомида “Давр банк” томонидан эълон қилинган ташқи рекламаларда “Davr Mobile иловасида 50 000 000 сўмгача онлайн микрокредит” мазмунидаги реклама ахбороти берилганлиги кузатилди.
Мазкур реклама бўйича банкнинг расмий веб-сайти ўрганилганда, микроқарз исталган мақсадларда фойдаланиш учун ажратилиши, Davr Mobile иловаси орқали расмийлаштирилиши, қарз олувчи камида охирги 6 ой давомида доимий иш жойига ҳамда ойлик даромадга эга бўлган бўлиши лозимлиги кўрсатилган. Шунингдек, микроқарз муддати – 60 ойгача, фоиз ставкаси – 43 фоиз, қарз миқдори – 50 миллион сўм этиб белгиланганлиги аниқланган.
Микроқарз бўйича қўшимча шартлар ва муҳим маълумотлар ташқи рекламада кўрсатилмаган.
Шунингдек, Тошкент шаҳрининг бир қатор кўчаларида жойлашган LED мониторли реклама объектларида “Тадбиркорлар учун 24 фоиздан 5 миллиард сўмгача кредит” мазмунидаги рекламалар жойлаштирилган.
Мазкур реклама бўйича банкнинг расмий веб-сайти ўрганилганда кредит:
- асосий воситаларни сотиб олиш учун;
- муддати – 60 ойгача;
- фоиз ставкаси – 32,99 фоиз;
- миқдори – 5 миллиард сўмлиги ҳақидаги маълумотлар кўрсатилган.
Кредит бўйича қўшимча шартлар ва муҳим маълумотлар ташқи рекламада кўрсатилмаган.
Юқоридагиларга кўра, қўмита махсус комиссияси томонидан қонун талаблари бузилиш аломатлари юзасидан “Давр банк”ка нисбатан белгиланган тартибда иш қўзғатилиб, молиявий жарима қўллаш ҳақида қарор қабул қилинган. Шунингдек, қонун бузилиши ҳолатини бартараф этиш ва келгусида йўл қўймаслик бўйича кўрсатма берилган.
Изоҳ (0)