“Айрим операцияларини чекладик” — Мамаризо Нурмуродов устав капитали етарли бўлмаган банкларга қандай чора кўрилгани ҳақида

Ўзбекистондаги бир нечта тижорат банкларининг устав капитали қонунчиликда белгиланган миқдордан кам бўлгани учун уларга нисбатан жазо чоралари қўлланган. Бу ҳақда Марказий банк раиси Мамаризо Нурмуродов 25 июль куни Тошкент шаҳрида ўтказилган журналистлар билан мулоқотда маълум қилди, дея хабар берди “Дарё” мухбири.

Ўзбекистонда 2023 йил 7 апрель куни “Банклар ва банк фаолияти тўғрисида”ги қонунга ўзгартиришлар киритилган. Қонуннинг 13-моддасига биноан, 2024 йил 1 апрелдан эътиборан тижорат банклари устав капиталининг энг кам миқдори 350 миллиард сўм этиб белгиланган.

Марказий банкда ўтказилган матбуот анжуманида мазкур талабни бажара олмаётган банкларга қандай санкциялар қўлланаётгани тўғрисида савол берилди. Марказий банк раиси Мамаризо Нурмуродов мазкур саволга жавоб қайтарди.

“Уч ёки тўртта банк устав жамғармаси 1 апрелда белгиланган даражага етмагани бўйича уларнинг кенгаши томонидан маълум мажбуриятлар олинган. Қаердан пул тушиши керак эди, нима сабабдан тушмай қолди, шу каби масалалар кўрсатилган ҳолда маълум мажбуриятлар олинган. Биз уларга устав жамғармасини тўлдириш вазифасини юкладик. Шу билан бирга, аҳоли билан ишлаш, омонатлар ҳамда бошқа масалалар бўйича амалга оширадиган операцияларини чеклаб қўйдик. 2025 йил 1 январдан минимал устав жамғармасига қўйилган талабни 500 миллиард сўмга етказиш бўйича ҳам ҳамма банкка индивидуал мажбуриятлар юклаганмиз. Биз банклар томонидан мажбариятларни бажармаслик ҳолатларини кузатмаяпмиз”, деди Марказий банк раҳбари.

“Банклар ва банк фаолияти тўғрисида”ги қонунга кўра, банк устав капитали сўмда шакллантирилади ҳамда банк муассислари ва акциядорлари киритган пул маблағларидан ёки давлатнинг қимматли қоғозларидан ташкил топади.

Аввалроқ Марказий банк қоидабузарликка йўл қўйгани учун 11 та банкка жарима санкцияси қўллагани хабар қилинганди.