Тошкентда 121 та жаримани тўламай келган режиссёрнинг машинаси хатланди 

Тошкент шаҳар Олмазор туманида 121 та жаримани тўламай келган режиссёрнинг машинаси хатланди. Бу ҳақда МИБ ахборот хизмати “Дарё”га хабар берди. 

Маълум қилинишича, мажбурий ижро бюросининг Олмазор туман бўлими иш юритувига Тошкент шаҳар ЙҲХБнинг қарорларига кўра, қарздор М.С.дан ундирувчи давлат ва банк фойдасига жами 121 та 84 миллион сўм миқдоридаги маъмурий жарима ундириш тўғрисидаги ижро ҳужжатлари келиб тушган.

Маъмурий жарималар билан боғлиқ ижро ҳужжатлари 2023 йилдан 2024 йилга қадар жами 121 та бўлса, шундан тезлик 77 та, йўл чизиғи 22 та, светофорнинг тақиқловчи ишорасига амал қилмаслик 16 та ҳамда 4 маротаба йўл қатнов қисмининг қарама-қарши йўналишида ҳаракатланиб, қоидабузарликлар содир қилган.

Қарздор маъмурий жарималар, банк олдидаги кредит қарзи ҳамда давлат фойдасига бож пулларини ихтиёрий тўламай келгани боис бюронинг туман бўлими томонидан мажбурий ижро ҳаракатларига киришилган. Ижро ҳаракатлари давомида қарздорга тегишли бўлган автотранспорт воситаси қарздорнинг хонадонидан топилиб, хатланди ва жарима майдонига жойлаштирилди.

Қарздор қоидаларни бузиши унинг режиссёрлик ва актёрлик касби билан боғлиқлигини билдириб, шунингдек, йўлда шошиб юришини айтган.