Дубайдаги ёнилғи қуйиш шохобчасида юз берган пичоқбозлик оқибатида Ўзбекистоннинг икки фуқароси ҳалок бўлди. Дубай жамоатчилик прокуратураси апрель ойида содир бўлган мазкур ҳодисани текширмоқда. Бу ҳақда Khaleej Times хабар берди.
Ҳодиса жабрланувчилар машина шиналарини шишириш учун шохобчага келганларида юз берган. Бунга эски келишмовчилик сабаб бўлгани тахмин қилинмоқда. Яқин атрофда хизмат олиб бораётган полиция ходими воқеа юзасидан зудлик билан тегишли идораларга хабар берган.
Терговга кўра, икки гуруҳ алоҳида транспорт воситаларида шохобчага етиб келган. Жабрланувчилардан бири қизил рангли Mercedes машинасидан тушиб, шиналарни текшираётган вақтида бир гуруҳ эркаклар ҳужумига учраган. Шу пайтда иккинчи жабрланувчи воқеа жойидан қочишга уринган, бироқ кўп ўтмай бошқа бир гуруҳ томонидан ушланган.
Воқеа жойига етиб келган Дубай полицияси ҳудудни қўриқлаган ва жиноятчилар қолдирган ашёларни йиғиб олган. Видеокузатув ёзувлари ҳамда гувоҳларнинг кўрсатмалари ҳуқуқ-тартибот идораларига воқеа тафсилотларини ва ҳодисада иштирок этган шахсларни аниқлашда ёрдам берган.
Тезкор тергов ишларидан сўнг полиция 11 нафар иштирокчини, шу жумладан асосий гумонланувчиларни қўлга олган. Ҳибсга олинганлар сўроқ пайтида можарога алоқадор эканини тан олган.
Расмийлар пичоқбозлик шахсий зиддиятдан келиб чиққани, унда бир-бирини илгари таниган одамлар иштирок этганини таъкидлаган. Мазкур ҳолат бўйича қонуний чора-тадбирлар кўрилиши учун иш прокуратурага топширилган. Дубай полицияси жамоатчиликни тинчлантириб, бундай зўравонлик ҳолатлари жуда кам учрашини ва амирлик ҳануз дунёдаги энг хавфсиз шаҳарлар қаторида эканини маълум қилди.
Изоҳ (0)