БМТ бош котиби: “Рамазон ойида Ғазо аҳолисининг дардига шерик бўлиш учун Рафаҳ назорат пунктига келдим”

БМТ Бош котиби Антониу Гутерриш Рафаҳ назорат пунктидаги вазиятни баҳолаш учун етиб келди, дея Euronews хабар берди.

Гутерриш 23 март куни Синай ярим оролидаги Эл-Ариш аэропортига Ғазодан эвакуация қилинган фаластинликлар даволанаётган касалхонага, Миср Қизил ярим ой жамияти қароргоҳига ташриф буюриш, шунингдек, Рафаҳ назорат пунктидаги вазиятни баҳолаш учун етиб келган. У Ғазодаги очарчиликни “маънавий хўрлаш” эканлигини айтиб, Ғазодаги фаластинликлар ҳали ҳам бошдан кечираётган  “даҳшатли туш”га ишора қилиб, ўт очишни тўхтатишга чақирган.

Яна айтаман: 7 октябрдаги ҲАМАС ҳужумларини ҳеч нарса оқламайди ва фаластинликларнинг жамоавий жазоланишини ҳеч нарса оқлай олмайди. Энди ҳар қачонгидан ҳам кўпроқ зудлик билан гуманитар ўт очишни тўхтатиш вақти келди, — деди Гутерриш.

БМТ Бош котиби Ғазо аҳолисига ёрдам кўрсатиш учун тўсиқсиз киришни таъминлашда Исроил тегишли мажбуриятларни олиши керак деб ҳисоблайди.

Рамазон ойида Ғазо аҳолисининг дардига шерик бўлиш учун Рафаҳ назорат пунктига келдим, — дея БМТ расмийси қўшимча қилган.

Шунинҳдек, БМТ Бош котиби ташкилот Фаластин анклавига ёрдам оқимини оптималлаштириш учун Миср билан ишлашда давом этишини маълум қилган.

Аввалроқ БМТ Хавфсизлик Кенгаши “зудлик билан ва барқарор ўт очишни тўхтатиш” тўғрисида резолюция бўйича консенсусга эриша олмади. Исроилнинг анклавга ҳужумлари давом этаётгани сабабли ҳаводан ёрдам Ғазо аҳолисига ёрдам беришнинг энг самарали усули бўлиб қолмоқда.