Ҳиндистон Хитой ва Покистон билан зиддият туфайли кенг кўламда қайта қуролланишни бошлади

Ҳиндистон ҳукумати Хитой ва Покистон билан зиддият шароитида армия учун катта миқдорда қурол сотиб олишни маъқуллади. Ракеталар, вертолётлар, артиллерия ва радиоэлектрон курашиш тизимларини сотиб олишга 8,5 миллиард доллар сарфланади, деб ёзмоқда Reuters.

Ҳиндистон бу сафар қуролларни хориждан сотиб олиш ўрнига буюртмаларнинг барчасини маҳаллий ишлаб чиқариш компанияларига беришни режалаштирмоқда. Бу Ҳиндистон ҳарбий-саноат комплексини мустаҳкамлашни мақсад қилган амалдаги бош вазир Нарендра Модининг стратегиясини намоён қилади.

“Покистон кучлари, Ҳимолай тоғларидаги баҳсли чегара бўйлаб Хитой қўшинлари билан зиддиятда турган Ҳиндистон Совет давридаги ҳарбий техникани модернизация қилишга интилмоқда”, — деб ёзади Reuters.

Ҳиндистон мамлакат ҳарбий-денгиз флоти ривожига алоҳида эътибор қаратмоқда, чунки ҳукумат ўтган йилдан буён Хитойнинг Ҳинд океанидаги фаоллиги ошганидан хавотирда.

Шунингдек, тасдиқланган харидлар рўйхатига 300 км масофага учадиган 200 та BrahМоs ракеталари, 50 та умумий мақсадли вертолётлар Су-30МКИ қирувчи самолётлари учун узоқ масофага учувчи ракеталар, 307 та 155 калибрли гаубицалар, шунингдек, йўлтанламас автомобиллар ва тракторлар киритилган.

Ҳиндистон ўзининг икки қўшниси Хитой ва Покистон билан яхши муносабатда эмас. Илгари улар билан ҳарбий тўқнашувлар содир бўлган, вақти-вақти билан шундай тўқнашувлар содир бўлиб туради. Ҳиндистон, айниқса, муҳим ҳарбий ва иқтисодий устунликка эга Хитойдан хавотирда. Бундан ташқари, яқинда Пекин ҳарбий харажатларни кескин оширганини эълон қилганди.