Тошкент туманлараро иқтисодий судида Octobank даъво аризаси бўйича Humansʼдан 500 миллиард сўмдан ортиқ қарздорликни ундириш ва етказилган зарарни қоплаш тўғрисидаги иқтисодий иш кўриб чиқилмоқда. Бу ҳақда банк матбуот хизмати хабар берди.
Маълум қилинишича, Octobank Humans билан ўзаро ҳисоб-китобларга хизмат кўрсатиш ва Humans молиявий хизмати доирасида чиқарилган карталар бўйича операцияларни амалга ошириш 2025 йил 13 июнь куни соат 18:00 дан бошлаб тўхтатади.
Бундай қарор Humans томонидан шартномавий муносабатларнинг мунтазам равишда бузилиши ва қабул қилинган мажбуриятларнинг бажарилмаслиги сабабли қабул қилинган. 2020 йилдан бери томонлар ўртасида молиявий хизматни биргаликда амалга ошириш бўйича келишув амал қилиб келган бўлиб, унда Octobank ҳамкор сифатида иштирок этган. Банк шартнома шартларини лозим даражада бажариб келган бўлса-да, Humans томонидан амалга оширилган клиринг операциялари бўйича қарздорлик ва кўрсатилган хизматлар учун комиссия қопланмасдан келмоқда.
Octobank Humans кобренд карталаридаги пул маблағлари Humans молиявий сервисидаги абонентларнинг шахсий ҳисобварағига ўтказилгани сабабли ушбу маблағларнинг ҳисоби ва қолдиғи Humansʼнинг ҳисобварақларида юритилишини ҳамда пул маблағларини қайтариш зарурати туғилганда, Humansʼга мурожаат қилиш лозимлигини билдирди.
“Ўзбектелеком” ҳам Humans катта миқдорда қарздорликни тўламасдан келганини маълум қилганди. Шу муносабат билан мавжуд қарздорликни ундириш ва келгусида компанияга зарарни камайтириш мақсадида тегишли судга даъво аризаси киритилган. “Ўзбектелеком” АК томонидан кўрсатилган хизматлар учун қарздорлик юзасидан 8 май куни Humans компаниясига нисбатан Тошкент шаҳар иқтисодий суди қарори чиқарилган.
Изоҳ (0)