Ўзбекистонда фаолият юритувчи Humans компаниясининг Сингапурдаги таъсисчиси — Humans Mobile Ltd Марказий банк ва “Ўзбектелеком” хатти-ҳаракатлари ортидан халқаро арбитражга шикоят киритганди. “Ўзбектелеком” бунга муносабат билдирди.
Унда келтирилишича, Humans виртуал оператори, бошқа мобил операторлардан фарқли равишда, ўз тармоғини яратиш учун сармоя киритмаган. Шунинг учун у мобил алоқа хизматларини кўрсатишга 2020 йилдан буён шартнома асосида “Ўзбектелеком” АК мобил тармоғидан фойдаланиб келган.
“Ўзбектелеком” Humans операторига нисбатан “бозордаги устун (монопол) мавқесидан фойдаланиб босим ўтказаётгани” тўғрисидаги ахборотлар нохолис эканлигини қайд этиб ўтди.
Аслида Humans ўз инфраструктурасига эга “Ўзбектелеком” АКдан ташқари Ucell, Beeline, Mobiuz каби бошқа мобил операторлари билан ҳам шартнома асосида хизматларини кўрсатиши мумкин, қонунчиликда фақат “Ўзбектелеком” АК билан мобил инфраструктурадан фойдаланиш керак, деб ҳеч жойда белгиланмаган, дейилади компания муносабатида.
Хизматларга “монопол юқори нарх” ҳақидаги давога нисбатан эса “Ўзбектелеком” Ўзбекистонда интернет хизматларини арзонлаштириш бўйича муҳим ишларни амалга ошириб келаётганини билдирди. Халқаро интернет каналларининг ўтказувчанлик қобилияти кенгайтирилиши ҳисобига оператор ва провайдерлар учун 1 Мбит/с интернет нархи 2017—2024 йилларда 40 баробарга арзонлаштирилган.
Маълум қилинишича, Humans виртуал оператори “Ўзбектелеком” мобил тармоғидан фойдаланиб, даромад топса-да, уни харажатларини тўлашни ортга суриб келмоқда.
Humans узоқ муддат давомида шартнома мажбуриятларини тизимли равишда бузиб келган, яъни кўрсатилган хизматлар бўйича катта миқдорда қарздорликни тўламасдан келган. “Ўзбектелеком” фақат истеъмолчилар ҳуқуқи бузилмасин, улар Humans бўладими, бошқа операторми, истемолчи тўлаган пулига яраша хизмат олсин, деб ўз хизматини давом эттирган, дейилади “Ўзбектелеком” муносабатида.
Таъкидланишича, шу муносабат билан “Ўзбектелеком” АК мавжуд қарздорликни ундириш ва келгусида компанияга зарарни камайтириш мақсадида тегишли судга даъво аризаси киритишга мажбур бўлган. “Ўзбектелеком” АК томонидан кўрсатилган хизматлар учун қарздорлик юзасидан 8 май куни Humans компаниясига нисбатан Тошкент шаҳар иқтисодий суди қарори чиқарилган.
Компания агар келгусида жамоатчиликни, тартибга солувчи органлар ва бизнес ҳамкорларни чалғитувчи, ҳақиқатга тўғри келмайдиган маълумотлар тарқатилса, ўз ишбилармонлик обрўсини ҳимоя қилиш мақсадида судга мурожаат қилиши ҳақида огоҳлантирди.
“Ўзбектелеком” очиқлик, ҳалол рақобат ва амалдаги қонунчиликка риоя қилиш тамойилларига содиқлигини тасдиқлайди. Компания бозордаги исталган иштирокчи, жумладан, Humans компанияси билан, улар ўз мажбуриятларини виждонан бажарган тақдирда конструктив мулоқотга очиқ, дея якунланган муносабат.
Марказий банк ҳам Humans Ўзбекистонга қарши халқаро арбитражга даъво киритгани юзасидан муносабат билдирганди. Унда “Мароқанд” АЖ тўлов ташкилотида фуқароларнинг пуллари қонунчиликда савдоси ва хизмат кўрсатилиши тақиқланган хизматларга (қимор ўйинлар) ўтказилгани сабабли ушбу тўлов ташкилотининг айрим тўлов хизматларини амалга ошириши олти ойга чеклангани ҳамда тўлов ташкилоти фаолиятида аниқланган ҳолатларга ҳуқуқий баҳо бериш учун тегишли ҳужжатлар ҳуқуқни муҳофаза қилувчи органларга тақдим этилгани қайд этилганди.
Изоҳ (0)