Муроджон Азимов Паралимпия ўйинлари совриндорига уй совға қилганди. Тадбиркор уй пулини ололмай сарсон

Қашқадарё вилояти ҳокими Муроджон Азимов Париж Паралимпия ўйинлари бронза медали соҳиби Довурхон Кароматовга икки хонали уй совға қилганди. Мазкур уйни қурган қурувчи ҳокимликлардан совға қилинган хонадон пулини ололмай сарсон бўлмоқда. Тадбиркор бу ҳақда Косон тумани ҳокими ва Муроджон Азимовга қайта-қайта мурожаат қилган. Бироқ натижага эришмаган.

Маълум бўлишича, 2025 йилнинг 11 апрель куни тадбиркор Косон тумани ҳокими Асрол Бойқараев ҳамда Қашқадарё вилояти раҳбари Муроджон Азимовга мурожаатнома йўллаган.

Ҳозирги кунда Кароматов Довурхон Фозил ўғли мулк ҳуқуқи мавжуд бўлмаса-да, ушбу хонадонни асоссиз равишда эгаллаб келмоқда. Бироқ шу кунга қадар хонадон учун тўлов Косон тумани ҳокимиятига бир неча бор мурожаат қилишимизга қарамасдан амалга оширилмасдан келинмоқда. Тўлов бўлмагани сабабли хонадон Проф стар лидер хусусий корхонаси балансида турибди. Бошқа барча хонадонлар сотилиб, фақатгина ушбу хонадон балансда тургани сабабли қўшимча солиқлар ва бошқа тўловлар келиб чиқмоқда, дейилади корхона раҳбари Баҳром Раҳмоновнинг ҳокимларга йўллаган мурожаатида.

Тадбиркор ҳокимликларга мурожаат қилар экан, 51,05 метр/квадратга эга хонадон учун дарҳол тўлов қилиниши кераклигини, агар уйнинг пули тўланмаса, хонадон калитини қайтариб беришларини сўраган.

Хонадон калити қайтариб берилишини ва Кароматов Довурхон ушбу хонадондан буюмларини олиб кетишини таъминлашингизни илтимос қиламан, дейди тадбиркор.

Тадбиркорнинг қўшимча қилишича, у шу муаммо сабаб саккиз ойдан бери Косон тумани ҳокимлиги ҳамда вилоят ҳокимлиги “эшигини қоқади”. Аммо ҳеч қандай натижага эришмайди.

Косон тумани ҳокимининг қабулига кириб бўлмайди. Мазкур муаммо билан шуғулланган биринчи ўринбосар “бир ҳафтадан кейин берамиз, ўн кундан кейин берамиз”, деб ваъда беришдан нарига ўтмайди, дейди у.

“Дарё” Париж Паралимпия ўйинлари бронза медали соҳибига совға қилинган уйнинг пули тўланмагани юзасидан Косон тумани ҳокимлиги ахборот хизмати билан боғланди. Масъул туман ҳокими билан суҳбатлашиб, вазиятга аниқлик киритишини маълум қилди.