“Қашқадарёда бир йилда битта район пайдо бўлмоқда”. Муроджон Азимов вилоятдаги туғилишлар сонига аниқлик киритди

Қашқадарё вилояти ҳокими Муроджон Азимов ҳар йили вилоятда 100 минг нафардан ортиқ туғилишлар бўлаётганини, 2023 йилдаги туғилишлар сонига эътибор қаратилса, ҳудудда бир йилда битта туман пайдо бўлаётганини айтди. Бу ҳақда “Дарё”га вилоят ҳокимлиги ахборот хизмати раҳбари Аҳрор Содиқов хабар берди.

Билдирилишича, бу ҳақда ҳоким вилоят ёшлари билан учрашув чоғида гапирган. 

Ҳар йили, масалан 2023 йилни айтяпман 102 минг 386 нафар одам туғилди. Муборак туманининг аҳолиси 92 минг нафар, Муборак тумани аҳолисидан 10 минг нафар кўп туғилиш. Бу дегани Қашқадарёда битта район пайдо бўляпти. Тасаввур қилинг, беш йилдан кейин уларга мактаб керакми? Боғча керакми? Худо кўрсатмасин касал бўлиб қолса, койка керакми? Уларга иш ўрни керакми? Буни ким қилади? Ўқимаса, ўз устида ишламаса, кейин у қаерга боради? Аёл кишининг ўзи саводсиз бўлса, у тарбиялаган бола қаерга боради? Аёл кишининг ишлашига кўпчилик қаршилик қилади, мутлақо нотўғри бу. Эртага аёл киши ишласа, боласини ҳам шунга қараб тарбиялайди, — дейди вилоят ҳокими.

Муроджон Азимовнинг қўшимча қилишича, 2022 йилда Қашқадарёдаги туғилишлар 96 минг нафар кишини ташкил қилган.