Қашқадарё вилоятида яна тўртта маҳалла “Обод хонадон-обод кўча-обод маҳалла” тамойили асосида таъмирланиб, аҳолига қулайликлар яратилади. Вилоят ҳокими Муроджон Азимов Қарши туманида бўлиб, ободонлаштириш ишлари бошлаб юборилган “Қуйи Бешкент” маҳалласида амалга оширилаётган ишлар билан танишди. Бу ҳақда “Дарё”га туман ҳокимлиги ахборот хизмати раҳбари Тўлқин Турдиев хабар берди.
Билдирилишича, Муроджон Азимов президент Шавкат Мирзиёев топшириғига кўра, вилоятдаги яна тўрттта маҳалла — Қуйи Бешкент (Қарши тумани), Обод Некўз (Касби тумани), Чироқчи (Косон тумани) ва Жонбулоқ (Ғузор тумани) маҳаллаларида “Обод хонадон-обод кўча-обод маҳалла” тамойили асосида ишлар бошланганини маълум қилган.
Вилоят ҳокими Қарши туманидаги “Қуйи Бешкент” маҳалласига келиб, амалга оширилаётган бунёдкорлик ва ободонлаштириш ишлари билан танишди. Маҳалла туманнинг энг обод манзилларидан бирига айланишини, маҳалла аҳлига тиббий хизмат кўрсатувчи “Қуйи Бешкент” шифо маскани тўлиқ капитал таъмирланишини гапириб берди. Маҳаллада аҳолига етказилаётган электр таъминотини янада яхшилаш мақсадида бажарилаётган ишлар режаси билан танишди, — дейди ҳокимлик масъули.
Таъкидланишича, маҳалла ҳудудида МФЙ биносининг йўқлиги сабабли айни пайтда янги бино барпо этилмоқда.
Унинг ёнидан Оталар чойхонаси қуриш, Бешкент—Чароғил автойўлига олиб чиқувчи йўл четидан пиёдалар йўлагини қуриш ишлари бажарилмоқда. Бундан ташқари, тиббий кўрик, маданий-маърифий тадбирлар, тарғибот ишлари ҳамда маҳалладаги барча хонадонларда ва кўчаларни тартибга келтириб, ободонлаштирилмоқда, — дейди Тўлқин Турдиев.
Қўшимча қилинишича, туман ҳокими Зоир Алиқулов вилоят ҳокими ва маҳалла аҳлига ҳудудда қилиниши режалаштирилаётган ишлар ҳақида маълумот бериб, тақдимот ўтказган.
Шунингдек, тумандаги барча маҳалла раислари иштирокида улар ҳам ўз маҳаллаларини ушбу “Қуйи Бешкент” маҳалласи каби ҳолатга келтиришлари учун шароитлар яратиш бўйича семинар ташкил этилди, — дейди у.
Изоҳ (0)