Қашқадарё вилояти ҳокими Муроджон Азимов таклифига кўра, Хитой Халқ Республикаси Жиансу провинцияси губернатори Сюй Кунлин бошчилигидаги 53 нафар тадбиркор Қашқадарё вилоятида бўлиб, вилоятда фаолият юритувчи тадбиркорлар ҳамда ҳамкорлар билан келишув битимларини имзолади. Мазкур ташриф давомидаги келишувлар натижасида хитойликлар вилоятга 350 миллион доллардан ортиқ сармоя киритадиган бўлди.
Ташриф давомида икки томонлама учрашув “Ўзбекистон (Қашқадарё) – Хитой (Жиансу)” бизнес форуми ва саноат маҳсулотлари кўргазмаси ўтказилди. Унда Хитой томони мазкур ташрифдан давлат раҳбарларининг 2023 йил 19 май куни Сиан шаҳридаги келишувлари ижросини таъминлаш кўзланганини таъкидлади. Шунингдек, 22 июль куни Чанжоу шаҳрида икки ҳудуд маъмуриятлари ва тадбиркорлари ўртасидаги учрашув ва бизнес-форумнинг амалий давоми экани эътироф этилди, — дейди бу ҳақда маълумот берган Аҳрор Содиқов.
.jpg)
Таъкидланишича, учрашув давомида Хитой томон “Бир макон, бир йўл” ташаббуси доирасида Қашқадарё вилоятида “Тўқимачилик саноат зонаси” ва “Ўзбек-Хитой” саноат паркини қуриш имкониятларини ўрганган. Жиансунинг йирик компаниялари иштирокида “яшил энергетика” йўналишида қўшма лойиҳалар амалга ошириш масаласини муҳокама қилган.
Шунингдек, учрашувда вилоятда нефть-газ ва сунъий тола ишлаб чиқариш йўналишида сармоявий ва кооперацион алоқаларни ўрнатишга, вилоятда етиштириладиган дукакли дон экинларини (мош, ловия ва нўхат) Жиансуга экспорт қилишга, Шаҳрисабз тумани ва шаҳридаги саноат зоналарида Жиансу компаниялари иштирокидаги қўшма лойиҳаларни амалга ошириш ҳисобидан, камбағалликни қисқартиришга келишиб олинди, — дейди ҳокимлик масъули.
.jpg)
Қўшимча қилинишича, Хитой томон вилоятнинг Миришкор туманидаги “Сечанкўл” ва “Ачинкўл” кўлларида Жиансу тажрибаси асосида балиқ ва қисқичбақасимонлар оиласига мансуб денгиз маҳсулотларини етиштириш нияти борлигини маълум қилган. Муборак, Косон, Кўкдала ва Қамаши туманларида маҳаллий тадбиркорлар билан ҳамкорликда ипакчилик кластерлари ташкил қилишга келишган.
Тадбир сўнгида Қашқадарё вилояти билан Жиансу провинцияси ўртасида дўстона алоқаларни ўрнатиш тўғрисида аҳдлашув меморандуми имзоланди, — дейди Муроджон Азимовнинг матбуот котиби Аҳрор Содиқов.
Аниқлаштирилишича, учрашув натижасида вилоятга умумий қиймати 350 миллион доллардан зиёд 20 та, жумладан, қиймати 338 миллион долларлик 18 та сармоявий келишувларга эришилган.
Келишувларга кўра, хитойлик тадбиркорлар вилоятнинг Муборак, Косон, Кўкдала ва Қамаши туманларида ипакчилик кластерлари ташкил этади. Қарши шаҳрида қишлоқ хўжалиги техникаларини (80 от кучли тракторлар ва агрегатлар) йиғиш йўлга қўйилади. Электротехника (сенсор) маҳсулотларни ишлаб чиқариш бошланади. Китоб туманида ҳар хил турдаги полистирин маҳсулотлари ишлаб чиқариш, Миришкор туманида трансформатор ва эҳтиёт қисмларини ишлаб чиқариш йўлга қўйилади. Яккабоғ туманида эса кафел маҳсулотлари ишлаб чиқариш ишлари амалга оширилади, — дейди Содиқов.
Изоҳ (0)