Олий Мажлис юқори палатасига Қашқадарё вилоятидан сайланган Абдураҳим Эркаев Сенат ялпи мажлисида ўзбекистонликларда суд-ҳуқуқ тизимига ишонч сўниб бораётгани ҳақида гапириб, бу борада “Африканинг айрим мамлакатларидан ҳам ортдамиз”, деди.
Сенаторга кўра, Ўзбекистон ўтган йили жаҳон одил судлов лойиҳасининг ҳуқуқ устуворлиги индекси бўйича беш поғонага пастлаб, 83-ўринни эгаллаган.
Жаҳон одил судлов лойиҳасининг ҳуқуқ устуворлиги индекси бўйича беш поғонага пастлаб 83-ўринни эгаллаб турибмиз. Беш поғона кўтарилганимизда бошқа гап эди. Энди худди шу индекснинг таркибига кирувчи фуқаролик одил судловига эришиш даражасининг юқорилиги субиндикаторида мамлакатимиз ўрни ўтган йилда 10 поғонага пасайди ва 96-ўриндан 106-ўринга чиқдик. Африканинг айрим мамлакатларидан ҳам орқадамиз, дейди Қашқадарё вилоятидан сайланган сенатор Абдураҳим Эркаев.
Абдураҳим Эркаевнинг айтишича, Ўзбекистонда кўп ҳолатларда суд қарорларининг ижроси кечиктирилади ёки бажарилмайди.
Бу ҳолат низоларни ҳал қилишда одил судловга эришиш қийинлиги, суд тизимига ишончнинг сусайиб бораётгани, мурожаатларни кўриб чиқишда адолат ва холислик принциплари аҳоли томонидан сезилмаётганидан далолат беради. Кўп ҳолатларда суд қарорларининг ижроси кечиктирилади ёки бажарилмайди, дейди сенатор.
Сенатор мазкур индикаторларни ҳисоблашда аҳоли ўртасида ҳам ҳар хил сўровлар ўтказилишини айтди.
Кейинги йиллардаги суд-ҳуқуқ тизимини ислоҳ қилиш бўйича амалга оширилган ишларимизнинг натижаси қани? Натижаси йўқ. Яхши эмас, орқага кетиш бор. Ким ишлаётган бўлса ижобий натижалари бор. Салбий натижа қайд этилган жойларда ишлар ўз ҳолига ташлаб қўйилган, деди у.
Изоҳ (0)