Қашқадарё вилояти ҳокими Муроджон Азимов ҳокимлик муассислигидаги газеталарни ривожлантириш тақдимоти билан танишди. Бу ҳақда ҳокимлик ахборот хизмати хабар берди.
Ҳоким кеча, 15 май куни Халқ депутатлари Қашқадарё вилояти кенгаши ва вилоят ҳокимлиги муассислигидаги “Қашқадарё” ва “Новости Кашкадари” газеталари бош муҳаррири Камолиддин Каримовнинг нашрлар фаолиятининг самарадорлиги, иқтисодий имкониятларини кенгайтириш ва ижодий юксалиши учун амалга ошириладиган ишлар юзасидан тақдимоти билан танишган.
2025 йилда ташкил этилганлигининг 100 йиллигини нишонлайдиган “Қашқадарё” газетаси бугунги кунда мамлакатимизда амалга оширилаётган кенг қамровли ислоҳотлар, вилоят ҳаёти ва халқаро майдонда рўй бераётган воқеаларга оид материалларни эълон қилиб келмоқда. Шунингдек, халқ депутатлари вилояти кенгаши ва вилоят ҳокими қарорларига шарҳлар бериб боришни ҳам йўлга қўйган.
Тақдимотда таҳририятнинг йиллик даромадини яхшилаш орқали моддий-техник базани яхшилаш, ишчи-ходимлар маошини ошириш, шунингдек, юзага келган муаммоларни ўз вақтида ечиш бўйича таклифлар тингланди. Вилоят раҳбари тақдимот билан батафсил танишиб, отахон газетани янада ривожлантириш бўйича ўз фикрларини баён этди, — дейилади ҳокимликнинг расмий каналида эълон қилинган баёнотда.
“Дарё” журналистининг бу ҳақдаги саволларига жавоб берган Камолиддин Каримовга кўра, аҳолиси салкам 3,5 миллион нафарни ташкил этувчи вилоятнинг отахон нашри айни кунда 2594 тиражда чоп этилмоқда.
-OKBnFdfR.jpg)
“Новости Кашкадари” газетамиз тўлиқ электрон вариантга ўтказилган. Бироқ кадр масаласи сабаб юргизиш қийин кечмоқда. Яхши кадрларга эҳтиёж бор, аммо уларни қониқтирадиган ойлик бериш имкониятимиз йўқ, ҳозирча. Шу боис айни пайтда 10 нафар “Қашқадарё” фидойиси газета учун жонбозлик қилиб, ишлаб турибди. Ҳокимга таклифлар билдирилди, натижа бўлишидан умидвормиз, — дейди вилоят ҳокими билан учрашган газета масъули.
Бош муҳаррирнинг аниқлаштиришича, ҳозирда газетада ўртача ойлик иш ҳақи 2 миллион 600 минг сўмни ташкил қилади.
Ходимларга кўпроқ ижод қилиб, кўпроқ гонорар ишлаб олиш имконияти яратилган. Демак, фаоллик кўрсатган ходимда кўп пул топиш имкони бор. Газетанинг битта сони учун 2 миллион сўм гонорар белгиланган. Ойда 4-5 та сон чиқарамиз, ходим уддаласа, ҳаммасини олсин. Қолаверса, газетага чоп этилмай, фақат сайтга қўйиладиган материаллар учун ҳам гонорар тўланади, — дейди Камолиддин Каримов.
-PGJgsdfU.jpg)
Муроджон Азимовнинг матбуот котиби Аҳрор Содиқовнинг билдиришича, ҳоким газетанинг моддий техник базасини янгилаш, обуна тарғиботини кучайтириш кераклигини айтган.
Кўпчилик ташкилотлар одатда матбуот тарқатувчилар орқали обуна бўлиб, сохта квитансиялар олиб, ўртада обуна учун дейилган пулнинг йўқ бўлиб қолиш ҳолатлари кузатилар эди. Шу сабаб газета обунасини Ўзбекистон почтаси орқали ташкил этиш режалаштирилмоқда. Муҳими обуна учун дейилган пуллар таҳририятга етиб борсин, — деди Аҳрор Содиқов.
Изоҳ (0)