Қашқадарё вилояти ҳокими Муроджон Азимов 22 нафар масъулни лавозимидан озод этди. Бу ҳақда вилоят ҳокимлиги матбуот хизмати хабар берди.
13 май куни ўтказилган йиғилишда вилоятда Сайхунобод, Уйчи ва Зарбдор тажрибаларини жорий қилиш, бандликни таъминлаш, аҳолини бизнесга жалб этиш, иқтисодиётда давлат иштирокини қисқартириш, давлат мулкини хусусийлаштириш орқали хусусий сектор улушини ошириш ва тадбиркорликни ривожлантириш учун шароит яратиш, муаммоли кредитлар улушини қисқартириш, жорий йил чақирув мавсумида сафарбарлик чақируви резерви хизматининг ташкил этилиши ҳамда Ҳисоб палатаси томонидан давлат харидларининг қонунийлиги юзасидан вилоятда ўтказилган ўрганишлар натижалари танқидий-таҳлилий муҳокама қилинган.
Йиғилиш кун тартибидаги масалаларни бажарилишида эътиборсизлик қилгани учун 22 нафар масъул лавозимидан озод этилди. Яна 29 нафарини вазифасидан озод этиш бўйича Республика раҳбариятига тақдимнома киритиладиган бўлди.
Шунингдек, 41 нафар масъулга навбатдаги интизомий жазо чоралари қўлланилган, 27 нафарининг фаолияти қониқарсиз деб топилиб, кейинги чорак якунлари бўйича ижобий ўзгариш қилмаган тақдирда, уларга нисбатан кескин чоралар кўрилиши тўғрисида огоҳлантирилган.
Изоҳ (0)