3,5 км йўл таъмирланди, ҳовузлар қурилди, тез ёрдам машиналари олиб келинди: Муроджон Азимов ғузорликларга берган ваъдасини бажарди

Қашқадарё вилояти ҳокими Муроджон Азимов Ғузор туманининг Тахам қишлоғида яшовчи аҳолига берган ваъдасини бажарди. Қишлоқда 3,5 км йўл таъмирланди, бир нечта сув ҳовузлари қурилди, тез ёрдам машиналари олиб келинди. Бу ҳақда “Дарё”га вилоят ҳокимининг матбуот котиби Аҳрор Содиқов хабар берди. 

Билдирилишича, вилоят ҳокими 2024 йилнинг 20 июль куни Ғузор туманидан 90 километр узоқликда жойлашган Тахам қишлоғига бориб, аҳоли билан мулоқот қилган ва мурожаатларини тинглаган. 

Вилоятимиз раҳбарининг ташаббуслари билан қатор туман ва қишлоқларда катта ўзгаришлар қилинмоқда. Шундай ҳудудлардан бири Ғузор туманидаги Тахам қишлоғидир. У ерда амалга оширилган ишлар ҳам вилоят раҳбарининг халқ билан мулоқоти натижасидир, дейди Аҳрор Содиқов. 

Аниқлаштирилишича, ҳоким ва аҳоли мулоқотидан сўнг қишлоққа трансформаторлар ўрнатилган, 3,5 километр тупроқ йўл шағал қилинган. 

Ичимлик суви таъминотини яхшилаш учун 1 та 30 тонналик ҳовуз таъмирланди. 5 та хонадонга янги ҳовузлар қурилди. Бундан ташқари, Тахам, Жонқора ва Кенгсой қишлоқларида янги маҳалла биноси қурилди. Ушбу қишлоқларга 1 тадан тез тиббий ёрдам машиналари олиб келинди. Қишлоқдаги 35-умумий ўрта таълим мактабининг ташқи фасади ҳамда бир нечта хоналари таъмирланди ва замонавий жиҳозлар билан таъминланди. “Ибрат фарзандлари” ўқув маркази ташкил қилиниб, мактабнинг кутубхонасига 1000 дона янги китоблар олиб келинди. Кам таъминланган оилаларнинг 100 нафар фарзандларига мактаб формалари ва ўқув қуроллари тарқатилди, дейди масъул.

Қўшимча қилинишча, қишлоқдаги эҳтиёжманд оилалардан 6 та хонадоннинг томи шифер билан ёпилган, 15 нафар боланинг суннат тўйи ўтказилган. 

Тахам қишлоғида ишсизлик муаммосини ҳал қилиш учун 35-умумий ўрта таълим мактабидаги 2 та бўш турган хона таъмирланиб, уларда тикувчилик цехи ташкил қилинди. Натижада 20 нафар хотин-қизлар бандлиги таъминланди. Қишлоққа 3 та махсус контейнер олиб келиниб, уларда сартарошхона, савдо дўкони ва жун титиш цехи ташкил этилди. Бу эса 6 нафар фуқароларнинг иш билан таъминланишига сабаб бўлди.

Шунингдек, қишлоқ аҳолисига жун йигирув ва гилам тўқиш ускуналари етказиб берилди. Натижада яна 24 нафар фуқаролар иш билан таъминланди. Чорвачилик йўналишида ҳам сезиларли ишлар амалга оширилди. “Қоракўл” маҳалласи фуқаролари учун 980 миллион сўм лимит ажратилди ва 28 нафар фуқарога 461 миллион сўм миқдорида кредит нақд пул кўринишида берилди. Ушбу лойиҳалар орқали қишлоқда жами 136 нафар фуқаро иш билан таъминланди, дейди Аҳрор Содиқов.