Андижон вилоятининг Хўжаобод туманида маиший чиқиндиларни ёқиш орқали электр энергияси ишлаб чиқарувчи завод қурилиши бошланди.
Чиқиндиларни бошқариш ва циркуляр иқтисодиётни ривожлантириш агентлигининг хабар қилишича, завод Хитойнинг Чина International Cамcе компанияси иштирокида барпо этилади. Лойиҳанинг умумий қиймати 140 миллион АҚШ доллари миқдорида бўлиб, бу орқали кунига 1,5 минг тонна чиқинди қайта ишланиб, йилига жами 240 млн кВт/соат электр энергияси ишлаб чиқарилади.
Завод 2025—2027 йилларда қурилиб, фойдаланишга топширилади ва унда 100 та янги иш ўрни яратилади.
Ушбу чора-тадбирлар президентнинг 2025 йил 24 март кунидаги “Қаттиқ маиший чиқиндиларни ёқиш орқали электр энергияси ишлаб чиқариш инвестиция лойиҳаларини амалга ошириш чора-тадбирлари тўғрисида”ги қарори ижроси юзасидан амалга оширилмоқда.
“Булар шунчаки завод эмас, ҳаёт-мамотимизни ҳал қиладиган масалалардан бири. Ер-сувларимизнинг яроқлилиги ҳам, аҳоли саломатлиги ҳам, ҳаво тозалиги-ю энергетика барқарорлигиям шу соҳага боғлиқ. Чиқиндилар тўғри тўпланиб, кўпроқ қайта ишланса, экологик мувозанат яхшиланади, табиат тоза бўлади, жамият ўзгаради”, деганди президент лойиҳаларнинг ижтимоий аҳамиятига алоҳида урғу бериб.
Бундай лойиҳалар 2025—2027 йилларда Андижондан ташқари, Бухоро, Жиззах, Қашқадарё, Навоий, Наманган, Самарқанд, Сирдарё, Фарғона, Тошкент вилоятлари ва Тошкент шаҳрида амалга оширилиши режалаштирилган.
Изоҳ (0)