ФВВ Сардоба фалокатидан кейин Сирдарёдаги таъмирлаш-тиклаш ишлари қандай кетаётгани ҳақида маълумот берди

Сирдарё вилоятида тошқиндан зарар кўрган ҳудудлар жонланмоқда. Ҳукумат комиссияси томонидан кўрилаётган тезкор чоралар натижасида вилоятнинг Сардоба, Оқолтин ва Мирзаобод туманларида фалокат оқибатларини бартараф қилишда сезиларли натижаларга эришилди, деб ёзмоқда Фавқулодда вазиятлар вазирлиги.

ФВВ хабарида Сардоба сув омбори билан боғлиқ фавқулодда вазият оқибатларини бартараф этишда Фавқулодда вазиятлар, Ички ишлар, Мудофаа вазирликлари, Миллий гвардиянинг куч ва воситалари жалб қилингани қайд этилган.

Ҳудудларни сув тошқинидан ҳосил бўлган лой ва бошқа чиқиндилардан тозалаш, йўлларни қайта тиклаш учун қурилиш соҳасидан 175 та техника ҳамда 416 нафар йўлсоз жалб қилинган ҳолда 23561 қум шағал аралашмаси билан йўл асоси тикланмоқда. Шунингдек, жами 24 та кўприкда диагностика ишлари амалга оширилиб, таҳлил натижаларини олиш учун лабораторияга тақдим қилинган.

Сув тошқини оқибатида зарар кўрган электр, газ ва сув тармоқлари қайта тикланмоқда. Таъмирлаш ва тиклаш ишлари учун 51 таъмирлаш бригадасидан 300 яқин малакали соҳа ходими, 32 та махсус ва 60 та хизмат автомашинаси ажратилган.

Тадбир бошидан 2 та подстанция, 78 та трансформатор пункти ва 254,1 км электр узатиш тармоқлари, 4 619 та электр устунларини таъмирлаш-тиклаш ишлари амалга оширилиб, улар ишга туширилган. Натижада электр таъминоти узилган 7 987 та аҳоли хонадонидан 7 388 таси электр энергия билан тўлиқ таъминланган.

Шунингдек, талафот кўрган 12 та аҳоли пунктидан 10 таси тўлиқ барқарор электр энергияси билан таъминланиб, қолган ҳудудларнинг электр тармоқларини тиклаш ва таъмирлаш ишлари давом эттирилмоқда.

Сардоба, Оқолтин, Мирзаобод туманларидаги 11 та аҳоли пунктида 66 километр газ қувури, 47 дона газ тақсимлаш қурилмаси ҳамда 7 550 дона маиший газ баллонига зарар етган. Бунинг оқибатларини бартараф этиш учун 50 нафар ходим ва мутахассис, 45 та автотранспорт воситаси жалб қилинган.

Бундан ташқари, ҳудудларни сувдан тозалаш мақсадида, 83 та сув тортиш насоси харид қилиниб, вилоят Фавқулодда вазиятлар бошқармасига топширилган. 19 та аҳоли пунктига доимий равишда 37 та махсус сув ташиш машинаси орқали ичимлик сувини етказиб бериш йўлга қўйилган.

Оқолтин тумани «Саховат» маҳалласидаги 2 та оқава сув иншоотининг насослари таъмирланган. Ҳудудда оқава сув тизими ишламоқда, дейилади ФВВ хабарида.

Аввалроқ Сардобадаги фалокатда салкам 6 минг турар жойга зарар етгани, Сирдарёда сув тошқинидан сўнг 7,5 мингдан ортиқ хонадоннинг газ, 10 мингдан ортиқ хонадоннинг электр таъминоти тиклангани, ҳудудда талафот кўрган алоқа объектлари қайта ишга туширилаётгани, тошқинлар оқибатида йўқолган 4 мингдан ортиқ уй ҳайвони ўз эгаларига қайтарилгани ҳақида хабарлар берилган.