Олий Мажлис Сенати кенгашининг навбатдаги мажлиси бугун, 28 март куни бўлиб ўтди ва уни Сенат раиси Танзила Норбоева олиб борди. Бу ҳақда Сенат матбуот хизмати хабар берди.
Маълум қилинишича, унда Сенатнинг эллик биринчи ялпи мажлисини 30 март куни чақириш тўғрисида қарор қабул қилинган.
Видеоконференсалоқа тизимидан фойдаланган ҳолда ўтказиладиган ялпи мажлисда қатор масалаларни муҳокама қилиш назарда тутилган.
“Телекоммуникациялар тўғрисида”ги, “Ўзбекистон Республикасининг айрим қонун ҳужжатларига суд ҳокимиятининг мустақиллиги кафолатларини мустаҳкамлашга, судлар фаолияти ҳақида жамоатчиликни хабардор қилишга ҳамда ягона суд амалиётини таъминлашга қаратилган ўзгартириш ва қўшимчалар киритиш тўғрисида”ги, “Ўзбекистон Республикасининг айрим қонун ҳужжатларига ўзгартиришлар киритиш тўғрисида”ги ва “Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида”ги қонунлар шулар жумласидан.
Шунингдек, ялпи мажлис кун тартибида “Жиноий даромадларни легаллаштиришга ва терроризмни молиялаштиришга қарши курашиш бўйича Евросиё гуруҳи тўғрисидаги Битимга ҳамда Жиноий даромадларни легаллаштиришга ва терроризмни молиялаштиришга қарши курашиш бўйича Евросиё гуруҳи бюджетини шакллантириш ва ижро этиш тартиби тўғрисидаги Низомга ўзгартиришлар киритиш ҳақидаги Баённомани (Тошкент, 2022 йил 1 июнь) ратификация қилиш тўғрисида”ги қонун ҳам ўрин олган.
Сенаторлар “Халқаро меҳнат ташкилотининг Ишлаётган эркаклар ва аёллар учун тенг муносабатлар ва тенг имкониятлар: оилавий мажбуриятларга эга ходимлар тўғрисидаги 156-сонли Конвенциясини (Женева, 1981 йил 23 июнь) ратификация қилиш ҳақида”ги қонунни ҳам кўриб чиқади.
Бундан ташқари, сенаторлар томонидан Инсон ҳуқуқлари бўйича вакилининг (омбудсманнинг) 2023 йилдаги фаолияти тўғрисидаги ҳисоботи эшитилади.
Ялпи мажлисда муҳофаза этиладиган табиий ҳудудларнинг сифат таркибини яхшилаш, ўсимлик ва ҳайвонот дунёсини асраш ҳамда кадастрини юритиш ҳолати юзасидан Вазирлар Маҳкамасига парламент сўрови юбориш масаласи муҳокама қилиниши ҳам режалаштирилмоқда.
Шу билан бирга, сенторлар Олий Мажлис Сенати кенгашининг бир қатор қарорларини тасдиқлаш масаласини ҳам кўриб чиқади.
Изоҳ (0)