Футбол бўйича Европа Чемпионлар Лигасининг ярим финал жавоб ўйида “Реал” ва “Бавария” 8 май, чоршанба куни ўзаро тўқнаш келади. Дастлабки ўйин Германияда бўлиб ўтган эди. Унда дуранг натижа қайд этилган. “Сантиаго Бернабеу”да ўтказиладиган жавоб учрашувига оид маълумотлар ва қизиқарли фактлар тақдим этилади.
Испания. Мадрид. “Сантиаго Бернабеу”
8 май, чоршанба
“Реал” –“Бавария” 00:00
Бош ҳакам: Шимон Марчиняк (Польша)
“Реал Мадрид”
Карло Анчелотти жамоаси бир нечта фронтда кураш олиб борди. Испания Примерасида муддатидан олдин чемпионга айланди.
“Бавария”га қарши 2:2 ҳисобида дурангдан сўнг мадридиклар “Кадис”ни 3:0 ҳисобида таслим этди. “Реал” сўнгги 5 ўйиннинг 3 тасида ғалаба қозонди. Ушбу ўйинларда 10 та гол уриб, 5 та голни ўз дарвозасидан олиб чиқди.
Давид Алаба жароҳати сабабли “қаймоқранглилар”га ёрдам бера олмайди. Узоқ муддатга сафдан чиққан дарвозабон Тибо Куртуа ниҳоят таркибга қайтди.
“Бавария”
Мюнхенликлар чемпионатда муваффақиятсизликка учради. Ҳозирда жамоа 2-ўринда бормоқда. Бундеслигадаги сўнгги ўйин ҳам Мюнхен жамоаси учун омадсиз кечди. Жамоа “Штутгарт”га 1:3 ҳисобида мағлуб бўлди.
Чемпионлар Лигасида клуб финалга чиқиш учун жиддий ҳаракат қилади.
Рафаэл Геррейру ва Кингсли Коман жароҳати сабабли жамоага ёрдам бера олмайди.
“Бавария” сўнгги 5 ўйинда 3 та ғалабага эришди. Бу ўйинларда жамоа 11 та гол урган ва 7 та гол ўтказиб юборган.
Ўйин олдидан қизиқарли фактлар:
Мюнхенликлар сўнгги 2 ўйинда ғалаба қозона олмаяпти;
Мадридликлар 6 йилдан буён “Бавария”ни енга олмаяпти;
“Бавария” ҳужумчиси Ҳарри Кейн мусобақада 8 та голга муаллифлик қилган.
“Реал” — “Бавария” ўзаро ўйинлар тарихига назар:
Европанинг икки гранди қитъалар даражасида жуда кўп тўқнаш келган, шулардан 17 таси Чемпионлар Лигасига тўғри келади. Устунлик — “Реал”да. Мадридликлар ўзаро ўйинларда 9 та ғалабага эришган. 5 та мағлубият ва 3 та дуранг қайд этган.
Бундан аввалги Чемпионлар Лигасидаги то‘қнашув 2018-йил баҳорига тўғри келган. Икки ўйин натижасига кўра “қаймоқранглилар” (2:2, 2:1) финалга йўл олган. Киев финалида мадридликлар “Ливерпуль”ни енгиб, шоҳсупага кўтарилганди.
Сўнгги ўйин эса ўтган ҳафта Мюнхенда бўлиб ўтди ва унда 2:2 ҳисобидаги дуранг натижа қайд этилди.
Мураббийларнинг ўйин олди фикрлари
Бор кучимиз билан ҳаракат қилишимиз керак, бу — ярим финал. Ҳаяжон бор, бизга қийин бўлади. Биринчи ўйинда рақибимиз биздан яхшироқ ўйнади.
Бу клублар бир-бирига ўхшайди. Иккаласида ҳам буюк анъана бор. Бу ўйинга оптимизм билан қарай олмаймиз, лекин умид қиламиз.
Дарвозани Лунин қўриқлайди. Куртуанинг ҳам ҳолати яхши, лекин унга ҳали вақт керак.
Карло Анчелотти, “Реал” бош мураббийи
“Мадрид стадиони ғалаба қозониш қийин бўлганларидан бири. Лекин бу имконсиз нарса эмас. Биринчи ўйинда яхши ҳаракат қилдик, бироқ ғалаба қозонмадик.
“Реал” ўз уйида ўйнагани ҳисобига 51% устунлик уларда бўлиши мумкин. Бу аниқ. Биз ҳам Европанинг катта клубларидан биримиз.
Финалга чиқишни хоҳлаймиз. “Уэмбли”да ўйнаш учун майдонга тушамиз.
Томас Тухель, “Бавария” бош мураббийи
“Реал” ва “Бавария” ўртасидаги учрашув Ўзбекистон вақти билан 8 майдан 9 майга ўтар кечаси 00:00 да старт олади.
Изоҳ (0)