Ижтимоий тармоқларда хонанда Шоира Отабекова автоҳалокатга учрагани айтилган видеолар тарқалди. Қўшиқчи ўз саҳифасида мазкур хабарни тасдиқлади.
Вилоят ИИБ ҳолат юзасидан маълумот берди. Унга кўра, ҳодиса 19 июнь куни соат 12:20 ларда Қўрғонтепа тумани, “Хуробод” маҳалласи ҳудудидан ўтган Д-138 автомобиль йўлининг 42-километрида содир бўлган.
1980 йилда туғилган Ш.О. ўзининг BYD song plus русумли транспорт воситасида Хонобод шаҳар йўналиши бўйлаб бошқариб кетаётиб, рул бошқарувини йўқотиши оқибатида йўл четидаги чегара сим тўсиғига бориб урилган.
Ушбу йўл-транспорт ҳодисаси оқибатида тан жароҳати олганлар йўқ. Транспорт воситаси техник шикастланган. Мазкур ҳолат юзасидан ҳозирда Қўрғонтепа тумани Ички ишлар бўлими ЙҲХГ ходимлари томонидан суриштирув ишлари олиб борилмоқда.
“Мен автоҳалокатга учрадим. Қарама-қарши йўналишга чиқиб, сиққан одам қочиб кетди. Ўзимга ҳеч нима бўлмади. Кўрамиз энди буни ортида ким турганини”, дейди хонанда.
Бундан аввал актриса Сабрина Жабборова хонанда Озода Нурсаидованинг “Дилбарим” клипини суратга олиш жараёнида автоҳалокатга учраб, ногирон бўлиб қолгани хабар қилинган эди. У ўз чиқишида воқеага сабабчи бўлганлар томонидан унга ҳеч қандай ёрдам кўрсатилмаётгани, ўз ҳолига ташлаб қўйилганини маълум қилган. Шундан сўнг клипни суратга олиш жамоаси вакиллари, хонанда ва унинг маъмури актрисага етарлича кўмак берилаётганини айтиб чиқишди. Кейинроқ Озода Нурсаидова масаладан тўлиқ хабари йўқлигини айтиб, Сабринадан узр сўради.
Изоҳ (0)