Қашқадарёлик тадбиркорни ҳақоратлаб, “прокурор лайчаси ва чўнтаги” деган “зампрокурор” жавобгар қилинди. Аммо у айблаган бизнесмен ҳамон ичкарида қолмоқда 

Қашқадарё вилоятининг Деҳқонобод туманида каврак шираси ва данагини экспорт қилиш билан шуғулланиб келган тадбиркор экологияга зарар етказиш, шунингдек, афғон фуқаросидан 53 минг доллар пулни олиб, вақтида маҳсулот етказиб бермаганликда пулларни ўз манфаати йўлида сарфлаб юборишда гумонланиб, қамоққа олинган. Бу ҳақда “Дарё”га тадбиркорнинг яқинлари маълум қилди. 

Аниқлик киритилишича, Деҳқонобод туманидаги “Исо Муҳаммад Нур” МЧЖ раҳбари Нуржаҳон Эгамшукуров 2023 йилнинг июнь июль ойларида туман ҳокимлиги заҳирасидаги ер фондига қарашли ерда табиий ҳолда ўсган 753 туп тожик кавраги ширасини олиб, уларнинг нобуд бўлишига сабабчи сифатида кўрилган. Ва натижада табиатга 372 миллион сўм зарар келтирганликда айбланган.

Шунингдек, тадбиркор афғон фуқаросидан 53 минг доллар пул олиб, эвазига 300 кг тожик кавраги донагини етказиб беришни ваъда қилганликда, бироқ ваъдасида турмай, афғон фуқаросига тегишли пулни ўз манфаати йўлида сарфлаб юбориб, фирибгарлик қилишда гумонланган. Шу сабаб тадбиркорга 2024 йилнинг 30 октябрь куни Жиноят кодексининг тегишли моддалари билан жиноят иши қўзғатилиб, айблов эълон қилинган.

Тошкент шаҳар прокурори тадбиркорга нисбатан қамоққа олиш тарзидаги эҳтиёт чорасини сўрагач, 2024 йилнинг 31 октябрь куни Яшнобод туман суди ёпиқ суд мажлисида буни кўриб чиқиб, Тошкент шаҳар прокурорининг илтимосномасини қаноатлантирган ва тадбиркорга қамоққа олиш тарзидаги эҳтиёт чорасини қўллаган. 

Зарар келтирдинг дея жиноят иши қўзғатишди. Айтилган зарарнинг барчаси, жумладан экологияга келтирилган 372 миллион сўмлик ва афғон фуқаросидан олиб еб кетдинг деган пул ҳам тўлаб берилди. Қопланди. Гарча айби ҳали исботланмаса-да. Лекин бу ишни тергов қилган прокурор ўринбосарининг адвокати сабабми Нуржаҳон ҳалиям ичкарида қоляпти. Унга нисбатан қўлланилган қамоқ эҳтиёт чораси бекор қилинмади, дейди тадбиркорнинг яқинлари. 

Деҳқонобод туманида каврак шираси ва донагини йиғиб олиб, уни сотиш орқали тадбиркорлик қилган Нуржаҳон Эгамшукуровни давлатга 372 миллион сўм зарар етказишда айблаган Бойсун прокурори ўринбосари Намоз Авазов телефон орқали сўзлашувларда қашқадарёлик мансабдорларни коррупционэр деб атади, шунингдек, судларни ҳақорат қилган. 

Қашқадарё гала коррупционэр экан-ку. Ҳамма тарафни энасиникига тиққан прокурор экан. Ҳали ўзига ҳам чиқаман. Эртага инспекцияга хат ҳам қилиб бераман устидан. Жавобини беради, дейди тадбиркор ишини тергов қилаётган прокурор ўринбосари. 

Нуржаҳон Эгамшукуровнинг яқинларига кўра, Бойсун прокурори ўринбосарининг телефон мулоқотлари орқали айтган бу гаплари, шунингдек тадбиркорни “прокурорнинг лайчаси ва киссаси”, деб атаган ҳолати Жиноят ишлари бўйича Термиз шаҳар судида кўриб чиқилган. Прокурор ўринбосари туҳмат ва ҳақорат қилишда айбланиб, 6 миллион 800 минг сўм миқдорида жаримага тортилган.