Чеченистон раҳбари Рамзан Қодиров Россия Суриядаги гуманитар фалокатнинг олдини олиши кераклигини айтди. Унинг фикрича, бунинг учун Россия ва янги ҳокимият ўртасидаги муносабатларнинг кескинлашувига йўл қўймаслик ҳамда “Ҳаят Таҳрир аш-Шам” (ҲТШ) гуруҳини тақиқланган террористик ташкилотлар рўйхатидан чиқариш тартиб-таомилини йўлга қўйиш лозим.
“Ижобий жараёнларни бошлаш учун Ҳаят Таҳрир аш-Шам ва унинг вакилларини Россиянинг террористик ташкилотлар рўйхатидан чиқариш тартибини ишга тушириш зарур. Бу жараённинг бошланиши ёки тугашини кутмасдан, икки мамлакат ўртасида дастлабки алоқаларни ўрнатиш ҳамда муаммоларни ҳал қилишни бошлаш имконини берувчи алоқа гуруҳининг ишини зудлик билан ташкил этиш муҳим”, деб ёзади Қодиров ўзининг Telegram каналида.
Унинг қайд этишича, бу инқироздан тезроқ чиқиш ва аҳолига ёрдам беришга имкон яратувчи жаҳон амалиётидир. Шунингдек, у Чеченистонда яшаб, меҳнат қилаётган суриялик фуқароларни алоқа гуруҳига жалб этишни таклиф этди.
10 декабрь куни Давлат думаси биринчи ўқишда, агар ташкилот ғайриқонуний фаолиятини тўхтатган бўлса, уни террорчилик ташкилотлари рўйхатидан чиқариш механизмини жорий этувчи қонун лойиҳасини қабул қилди. Россияда амалдаги қонунчилик ташкилотларни мазкур рўйхатдан чиқариш имкониятини назарда тутмайди.
“Ҳаят Таҳрир аш-Шам” бошчилигидаги қуролли гуруҳлар ноябрь ойи охирида Сурияга ҳужум бошлаган эди. Икки ҳафтадан камроқ вақт ичида улар Дамашққа кириб, мамлакат ҳокимиятини эгаллади. 12 декабрь куни Россия гуруҳнинг сиёсий қўмитаси билан алоқалар ўрнатгани ҳақида маълум қилди.
Изоҳ (0)