Ҳукумат қарори билан кўп квартирали уйларни бошқариш органларининг электрон реестрини юритиш бўйича маъмурий регламент тасдиқланди.
Унга кўра, кўп квартирали уйларни бошқариш органларининг электрон реестрини шакллантириш ва юритиш ҳамда кўп квартирали уйларни бошқариш органларига бириктириш бўйича давлат хизматларини кўрсатиш тартиби белгиланди.
Бунда талабгор ёки бошқариш органи сўровнома бериш учун Давлат хизматлари марказлари ёки ЯИДXP орқали мурожаат этади. Сўровнома ЯИДXP орқали дам олиш ва байрам кунларидан қатъи назар, ҳар куни 24 соат давомида юборилиши мумкин.
Давлат хизмати кўрсатилгани учун БҲМнинг 50 фоизи (187 минг 500 сўм) миқдорида йиғим ундирилади.
Сўровнома ва унга илова қилинган ҳужжатларда нотўғри маълумотлар кўрсатилиши, шунингдек, белгиланган йиғимни тўламаслик давлат хизматларини кўрсатишни рад этиш учун асос ҳисобланади.
Электрон реестрга кириш учун қуйидаги ҳужжатлар илова қилинади:
- талабгорнинг кўп квартирали уйни бошқариш учун мавжуд ишчи-хизматчилари ҳамда моддий-техник базаси тўғрисидаги маълумотлар паспортининг тасдиқланган нусхаси;
- тасдиқланган штатлар жадвали;
- тегишли малака сертификат.
Президентнинг 2021 йил 19 июндаги қарорига асосан кўп квартирали уй-жойларни бошқарувчиларнинг электрон реестри шакллантирилган. Давлат раҳбарининг 2023 йил 15 августдаги қарори билан кўп квартирали уйларни бошқариш органларининг электрон реестрини шакллантириш ва юритиш тартибини такомиллаштириш белгиланганди.
Ушбу қарор билан Ўзбекистонда 2024 йил, 1 январдан бошлаб қурувчи ташкилот қурилиши тугалланган кўп квартирали уйни бошқариш учун бошқарувчи ташкилот жалб қилиши белгиланган. Бошқарувчи ташкилот аниқланмаган тақдирда кўп қаватли уйлар фойдаланишга қабул қилинмайди.
Изоҳ (0)