Тошкент шаҳри ҳокими вазифасини бажарувчи Шавкат Умурзоқов 26 декабрь куни “Кўп квартирали уйларни таъмирлаш бўйича инжиниринг компанияси” давлат муассасасини ташкил этиш тўғрисидаги қарорни имзолади. Қарор президентнинг 2023 йил 28 августдаги фармони асосида қабул қилинган.
Қуйидагилар мазкур давлат муассасасининг асосий вазифалари этиб белгиланди:
- Ўзбекистон президенти ва Вазирлар Маҳкамаси, халқ депутатлари Тошкент шаҳар кенгаши ва Тошкент шаҳар ҳокимининг тегишли ҳужжатлари асосида берилган вазифа ҳамда топшириқларни сифатли ва ўз вақтида бажарилишини таъминлаш;
- Кўп квартирали уйларни реконструкция қилиш ва мукаммал таъмирлаш ишларини амалга оширишда белгиланган муддатларда фойдаланишга топшириш юзасидан шартнома мажбуриятлари бажарилишини таъминлаш;
- Бирламчи рухсат берувчи, лойиҳаолди ва лойиҳа ҳужжатларининг белгиланган муддатда сифатли тайёрланишини таъминлаш, шаҳарсозлик тўғрисидаги қонунчилик ҳужжатлари талабларига риоя қилиш;
- Объектларда қурилиш-монтаж ишларини амалга ошириш учун зарур шарт-шароитлар яратиш;
- Лойиҳаларни молиялаштириш манбаларини аниқлаш, харидларни режалаштириш, харидлар тартиб-таомилларини белгилаш ва унинг шаффофлигини таъминлаш;
- Лойиҳаларни бошқариш ва қурилиш ишлари бўйича техник назорат олиб борилишини таъминлаш, муаллифлик назоратини ташкил этиш ҳамда шаҳарсозлик нормалари ва қоидаларига риоя қилган ҳолда объектларни фойдаланишга қабул қилиш ишларини ташкил этиш.
Шунингдек, компания кўп квартирали уй-жой фонди объектларини таъмирлайди, модернизация қилади ҳамда энергия самарадорлигини оширади. Бундан ташқари, кўп квартирали уйларда лифтларни алмаштиради, таъмирлайди, модернизация қилади.
Бюджет тизими бюджетлари ҳисобидан кўп квартирали уйларни таъмирлаш билан боғлиқ барча тадбирлар бўйича ишлаб чиқиладиган дастурлар ва манзилли рўйхатлар Қурилиш ва уй-жой коммунал хўжалиги вазирлиги билан келишилади.
Эслатиб ўтамиз, 2023 йилнинг август ойида Тошкент шаҳри ҳокимлиги муассислигида давлат ва тадбиркорлик субъектлари ўртасида “кўприк” вазифасини бажарувчи “Тошкент Инвест компанияси” акциядорлик жамияти ташкил этилиши тўғрисида хабар берилганди.
Изоҳ (0)