Ўзбекистонда сентябр ойида кўчмас мулк бозори бир оз қисқарган бўлиб, фақат Самарқанд вилоятида ўртача фаолликни сақлаб қолишга эришилди. Бу ҳақда Иқтисодий тадқиқотлар ва ислоҳотлар маркази навбатдаги шарҳида сўз боради.

Қайд этилишича, сентябр ойида кўчмас мулк савдоси 17 фоизга камайган, олди-сотди битимлари сони бир ой олдинги 28 мингтага нисбатан 23 мингтани ташкил этган.

Энг юқори пасайиш Навоий вилоятида 32 фоиз, Қорақалпоғистон Республикасида ва Тошкент шаҳрида 24 фоиз қайд этилган. Кўчмас мулк бозорида ўртача фаолликни сақлаб қолган ҳудудлар Самарқанд вилояти бўлиб, бу ерда ой давомида сотувлар 7,4 фоизга ошган.

Январь—сентябр ойларида республикада кўчмас мулкни сотиш ҳажми ўтган йилга нисбатан 1,4 фоизга ўсган, бу атиги 324 та битимга кўп. Ҳудудлар кесимида йил давомида сотувлар Самарқанд вилоятида 52 фоизга, Қашқадарё ва Бухоро вилоятларида 30 ва 29 фоизга ўсган.

Таъкидланишича, Ўзбекистонда кўчмас мулк билан боғлиқ битимларнинг қарийб 50 фоизи Тошкент шаҳри, Тошкент ва Фарғона вилоятларига тўғри келади.

Тошкентда уй-жой ижараси бозоридаги вазият

Сентябр ойида Тошкент шаҳрида ижаранинг ўртача нархи август ойидаги 8,9 долларга нисбатан 2,2 фоизга ошиб, 1 квадрат метр учун 9,1 долларни ташкил этган.

Уй-жой ижараси учун энг юқори нархлар пойтахтнинг учта туманида – Шайхонтоҳур, Яккасарой ва Миробод туманларида квадрат метри учун 11 доллардан ошади.

Энг паст кўрсаткичлар Учтепа, Сергели ва Бектемир туманларида бир квадрат метр учун 7,4 дан 5,8 долларгача.

Шу билан бирга, ижара нархининг энг юқори ўсиш суръатлари пойтахтнинг Сергели ва Олмазор туманларида мос равишда 6,5 фоиз ва 6,4 фоизга ҳамда Бектемир туманида 5 фоизга ошгани қайд этилган. Бир ой ичида Миробод, Юнусобод ва Мирзо Улуғбек туманларида ижара нархи 1,6 фоиздан 3,5 фоизгача арзонлашган.

Иккиламчи кўчмас мулк бозори

Сентябр ойида иккиламчи бозорда уй-жой нархининг ўртача ўсиши бир квадрат метр учун 2,9 фоизга ошган, ўтган йилнинг сентябр ойидан буён уй-жой нархи 22,3 фоизга ошган.

Хусусан, Тошкент шаҳрида сентябр ойида иккиламчи уй-жой нархи 1,3 фоизга ошган. Энг юқори ўсиш Шайхонтоҳур — 1,8 фоиз, Миробод — 2,3 фоиз ва Яккасарой — 3,9 фоиз туманларида қайд этилган. Ўтган йилнинг сентябр ойига нисбатан пойтахтда ўртача уй-жой нархи 29,1 фоизга ошган.

Аввалроқ президент қарори билан кўп квартирали уйлардаги кўчмас мулк бўйича битимлар мулкдорнинг қарздорлиги йўқлиги текширилгандан кейин тасдиқланиши, кўп квартирали уйларни бошқариш органлари томонидан фаолиятини амалга ошириш жараёнида тегишли мулкдорларнинг ҳуқуқлари бузилишини олдини олиш мақсадида Қурилиш ва уй-жой коммунал хўжалиги соҳасида назорат қилиш инспекциясига қўшимча ваколатлар берилиши ҳақида хабар берилган эди.