Ўзбекистонда бошқарувчи ташкилот аниқланмаган янги кўп қаватли уйлар фойдаланишга қабул қилинмайди. Бу ҳақда президентнинг 15 августдаги қарорида белгиланди.
“Кўп квартирали уйларни бошқаришни янада самарали ташкил қилиш чора-тадбирлари тўғрисида”ги қарорга кўра, 2024 йил, 1 январдан бошлаб қурувчи ташкилот қурилиши тугалланган кўп квартирали уйни бошқариш учун бошқарувчи ташкилот жалб қилади. Бошқарувчи ташкилот аниқланмаган тақдирда кўп қаватли уйлар фойдаланишга қабул қилинмайди.
Амалдаги тартибга кўра, қурилиши тугалланган ва фойдаланишга қабул қилинган кўп квартирали уй-жойни бошқариш биринчи икки йилда қурувчи томонидан амалга оширилади. Қурувчи бошқариш усулини танлайди ёки мазкур вазифани амалга ошириш учун шартномага асосан бошқарувчи ташкилот жалб қилиши мумкин. Биринчи икки йил ичида кўп квартирали уй-жойдаги қурувчидан ташқари мулкдорларнинг сони 50 фоиздан ошган тақдирда мулкдорлар томонидан белгиланган тартибда умумий йиғилиш қарорига мувофиқ кўп квартирали уй-жойни бошқариш усули танланади.
Президент қарорида белгиланишича, Қурилиш ва уй-жой коммунал хўжалиги вазирлиги 1 ой мудаатда кўп квартирали уйларни бошқариш соҳасидаги қонунчиликни такомиллаштириш бўйича қуйидагиларни назарда тутувчи қонун лойиҳасини Вазирлар Маҳкамасига киритиши лозим:
- кўп квартирали уйлар ва уларга туташ ер участкалари учун қарз маблағлари, шу жумладан банк кредитлари кўп квартирали уйларнинг барча жойлар мулкдорлари томонидан бир овоздан қабул қилинган қарор асосида олиниши мумкинлиги;
- кўп квартирали уйни бошқариш ташкилотини ёки бошқарувчини алмаштириш муддатига чеклов қўйиш;
- кўп квартирали уйни бошқариш усулини ва бошқариш органини танлаш масаласи юзасидан барча жойлар мулкдорларининг ёки улар вакилларининг 50 фоизидан кўпроғи уни ёқлаб овоз берса, умумий йиғилиш қарори қабул қилинган деб ҳисобланиши.
Аввалроқ президентнинг ушбу қарори билан кўп квартирали уйлардаги кўчмас мулк бўйича битимлар мулкдорнинг қарздорлиги йўқлиги текширилгандан кейин тасдиқланиши, кўп квартирали уйларни бошқариш органлари томонидан фаолиятини амалга ошириш жараёнида тегишли мулкдорларнинг ҳуқуқлари бузилишини олдини олиш мақсадида Қурилиш ва уй-жой коммунал хўжалиги соҳасида назорат қилиш инспекциясига қўшимча ваколатлар берилиши ҳақида хабар берилган эди.
Изоҳ (0)