Украина Хавфсизлик хизмати 13 июль куни Киевда украиналик разведкачи Иван Воронични ўлдирганликда гумон қилинган россиялик махсус хизмат ходимларини йўқ қилганини маълум қилди. Бу ҳақда CNN хабар берди.
Киев украиналик разведкачининг ўлимига Россия Федерал хавфсизлик хизмати айбдорлигини таъкидлаган. Иван Воронич 10 июль куни эрталаб Киевда отиб ўлдирилганди.
Эркак ва аёл гумонланувчилар украиналик разведкачига суиқасд уюштирганидан кейин “кўздан нари бўлишга” ҳаракат қилган. Шундан сўнг, Украина хавфсизлик хизмати (УХХ) ва Миллий полиция ходимлари Киевда қидирув ишларини бошлаган.
“Яширин суриштирув ва фаол контрразведка тадбирлари натижасида душман жойлашуви аниқланган. Ҳибсга олиш пайтида улар қаршилик кўрсатган. Отишма содир бўлиб, улар йўқ қилинган”, деди УХХ раҳбари Василий Малюк.
Малюк отишма тугагач ҳодиса жойида видео суратга олиб, шундай деган:
Эслатиб ўтмоқчиманки, Украина ҳудудида душман учун ягона истиқбол — ўлим!
УХХ маълумотларига кўра, дастлаб гумонланувчиларнинг иккаласи ҳам таъқиб қилинган. Шундан сўнг улар хавфсиз жойда овоз сўндиргичли тўппонча билан отиб ўлдирилган.
УХХ Украинанинг асосий хавфсизлик хизмати бўлиб, у ҳам ички хавфсизлик, ҳам Россияга қарши саботаж операциялари учун жавобгар саналади. Айнан шу ташкилот июнь ойида Россия аэродромларига йирик дрон ҳужуми уюштирганди.
Изоҳ (0)