Эрон Қўшма Штатлар билан музокараларни қайта бошлашга тайёр, аммо бу борада ишонч масаласи мавжуд. Бу ҳақда Эрон президенти Масъуд Пезешкиён америкалик журналист Такер Карлсонга берган интервьюсида маълум қилди.
“Музокараларни қайта бошлашда бизда ҳеч қандай муаммо йўқ. Бироқ музокараларни қайта бошлаш борасида бир шарт бор”, дея таъкидлади Пезешкиён.
“Қўшма Штатларга яна қандай ишонсак бўлади? Музокараларга қайтганимизда, музокара жараёнида Исроил режимига бизга яна ҳужум қилишга рухсат берилмаслигига қандай ишонч ҳосил қилишимиз мумкин?”, деди Эрон президенти.
Шунингдек, у Исроилнинг ҳаракатлари натижасида “бартараф этилиши лозим бўлган инқироз” юзага келганини таъкидлаган.
“Айтганимдек, енгиб ўтишимиз керак бўлган инқироз бор. Ва музокараларни қайта бошлаш учун шарт мавжуд”, дея қўшимча қилди Пезешкиён.
Эрон президенти Теҳрон Яқин Шарқ минтақасида тинчлик бўлишини хоҳлаши ва Вашингтон билан барча келишмовчиликларни мулоқот орқали ҳал этишга тайёрлигини, бироқ унинг фикрича, Исроил раҳбарияти бунга қарши эканини билдирган.
“Ишончим комилки, биз зиддиятларимизни осонликча ҳал қилишимиз ва АҚШ билан келишмовчиликларни мулоқот орқали бартараф этишимиз мумкин, аммо, афсуски, Нетаньяху бу дипломатик саъй-ҳаракатларни барбод қилди”, деди у интервью давомида.
Пезешкиённинг таъкидлашича, Эрон ҳеч қачон “ҳуқуқларни ҳурмат қилиш”дан ва тинч-осойишта ҳаёт кечиришдан бошқа нарсани истамаган, аммо зарур бўлганда ўзини ҳимоя қилишга қодир.
Унинг сўзларига кўра, АҚШ президенти Дональд Трамп Яқин Шарқ минтақаси муаммоларини ҳал қилиш ва уни тинчликка олиб чиқишга ёрдам бериши ҳам, “уни абадий урушларда қолдириши” ҳам мумкин.
Шунингдек, президент Эрон олий раҳнамоси Оятуллоҳ Али Хоманаий аввалроқ унга АҚШнинг Эронга сармоя киритишига ҳеч қандай тўсиқ йўқлигини айтганини маълум қилган.
“Ҳеч қандай чеклов йўқ ва ҳеч нарса америкалик инвесторларнинг Эронга келиши ва сармоя киритишига тўсқинлик қилмайди. Бироқ Исроил воқеаларнинг бундай ривожланишини истамайди”, дея таъкидлади у.
Исроил 13 июнь кечаси Эронга зарбалар беришни бошлади. Уларнинг мақсади Теҳроннинг ядро ва ракета дастурлари билан боғлиқ объектлар эди. Бир суткадан камроқ вақт ўтиб, Эрон жавоб ҳужумини амалга оширди. 22 июнь кечаси АҚШ Қуролли кучлари Эроннинг учта ядровий объектига ҳужум қилди, 23 июнь кечқурун эса Теҳрон Қатардаги Яқин Шарқнинг энг йирик Ал-Удейд Америка ҳаво базасига ракета зарбалари берди. Кейинроқ АҚШ президенти Дональд Трамп Исроил ва Эрон ўт очишни тўхтатиш режимига келишиб олганини маълум қилди. Бу келишув 24 июндан кучга кирди.
Изоҳ (0)