Алишер Абдусаломов 29 август куни Ўзбекистоннинг Жанубий Кореядаги янги элчиси сифатида иш бошлади.
“Дунё” ахборот агентлигининг хабар қилишича, у Сеулга тайинланишидан аввал Олий Мажлис Сенати раиси котибиятига раҳбарлик қилган.
Дипломат 40 ёшда. Тошкентдаги Халқаро Вестминстер университети ва Жанубий Кореянинг Кёнг-Хи университетини битирган.
Алишер Абдусаломов касбий фаолиятини Ўзбекистон Инвестициялар ва ташқи савдо вазирлигида (ҳозирги Инвестициялар, саноат ва савдо вазирлиги) бошлаб, етакчи мутахассисликдан бош бошқарма бошлиғигача бўлган лавозимларда фаолият юритган.
2013—2016 йилларда Ўзбекистоннинг Япониядаги элчихонасида савдо-иқтисодий масалалар бўйича маслаҳатчи, 2018—2024 йилларда эса Жанубий Кореяда ҳам ушбу лавозимда ишлаган.
Алишер Абдусаломов 1995 йилдан 2024 йилгача қисқа танаффус билан Ўзбекистоннинг Сеулдаги элчихонасига раҳбарлик қилган Виталий Фен ўрнига тайинланди. У июнь ойида 77 ёшида вафот этганди.
Июнь ойида Вон До Ён Жанубий Кореянинг Ўзбекистондаги янги элчиси этиб тайинланганди.
Изоҳ (0)